Qırımda gece patlavlar eşitildi, Aqyarda ava telükesi ilân etildi, dep haber ete Rusiye akimiyeti ve yerli Telegram kanalları.
Aqyarda iyulniñ 16-sı aqşamından iyulniñ 17-si sabasına qadar ava telükesi ilân etildi, dep aytıla şeerniñ Rusiye yolbaşçısı Mihail Razvojayevniñ haberinde. Ücüm aqibetlerini o, bildirmedi, amma iyulniñ 17-nde sabadan berli Aqyarda elektrik energiyası sıñırlı şekilde berile.
"Krımskiy veter" Telegram kanalı bildirgenine köre, gece Keriçte bir çoq patlav eşitildi. demiryol vokzalına qarşı darbe aqqında haber etile. Anbar, eşelon ve elektrik stantsiyalı cermay bazasına qarşı darbelerniñ endirilmesi mümkün. Bu malümat qoşma delillernen isbatlanmalı.
Bundan ğayrı, Kefe, İçki, Aqmescit ve Kezlevde dron, atış ve patlav sesleri eşitildi.
Rusiye arbiyleri Rusiye regionları, Qırım, Azaq ve Qara deñizlerinde urıp tüşürilgen 243 ukrayin uçucısızı aqqında esabat beyerdi. Bunıñ delili kösterilmedi. Tüşürilemeyegen dronlarnıñ sayısını müessise aydınlatmadı.
Ukrayina arbiyleri ücümni şimdilik izaatlamadı.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.