«Anaçığım, qaçmaq kerek»: turistler Ukrayına Silâlı quvetleriniñ raketalarından qaçqan Qırım plâjı – eki yıl keçti

«Qırımdan ketmege istemeyim, o qadar sıcaq, ev kibi» ve «Anaçığım, mından qaçmaq kerek» – 2022 senesi yazda Rusiye ava bazasında olğan patlavlardan soñ Novofedorovkadaki plâjda populâr internet memleri. O vaqıt büyük «darbeler» bir çoq turistni bu plâjdan ve Qırım yarımadasından qaçmağa mecbur etti. Novofedorovkanıñ kurort alanından berli ne deñişti, Qırım.Aqiqatnıñ maqalesinde oquñız.

Qırımdaki Rusiye arbiy obyektlerine qarşı muntazam darbeler Rusiyeniñ Ukrayınağa qarşı büyük istilâsından soñ qayd etilip başlandı.

Ukrayına Silâlı quvetleri bu adise-vaqialar ile alâqası olğanını tasdıqlap, Qırımdan arbiy tehnika ve arbiylerni cenübiy cebege taşığan Rusiye logistikasını yoq etmege tırışa, dep añlata.

Saq rayonı Novofedorovkadaki «Saki» arbiy uçaq alanında eñ büyük adiseler oldı. 2022 senesi avgustnıñ 9-nda Ukrayına Silâlı quvetleriniñ raketa darbesi neticesinde arbiyler ve vatandaş obyektleri zarar kördi.

Новофедоровка: взрывы в районе военного аэродрома (видео)

O adise Rusiye turistlerini pek qorquzdı, bir çoq kişi Qırım yarımadasını terk etti.

Ukrayına Silâlı quvetleriniñ Rusiye ava bazasına qarşı raketa darbesinden soñ Novofedorovka plâjı, 2022 senesi avgustnıñ 9-ı

Neticede Novofedorovkada kene patlavlar eşitildi. Bu yıl mart ayında «Qırım yeli» Telegram kanalı bu qasabanıñ yalı kenarında qaviy inşaatlarnı ve Rusiye arbiyleriniñ ateş noqtalarını kösterdi.

Rusiyeniñ Ukrayınağa qarşı büyük istilâsı vaqtında Saq rayonınıñ Novofedorovka plâjında Rusiye ateş noqtaları, 2024 senesi martnıñ 31-i

Novofedorovkada arbiylernen qomşulıq sıqı olğanına baqmadan, kurort mevsimi açıldı ve raatlanğanlar qabul etile.

«Komendnant saatı yoq, bir şey qapalı degil»

Qırımlı bloger Nikolay Mol iyünniñ ortasında Novofedorovkanı ziyaret etti. Onıñ aytqanına köre, qasabanıñ yalısında maşina turacaq yer yoq.

«Bu yıl öşekler çoq edi. Mında komendant saatını yapmağa isteyler, dep aytqan ediler – 21:00-den soñ kimseni yibermeycekler, ve plâjnıñ yarısını qapatacaqlar. Kelip şaştım. İnsanlar raatlana, komendant saatı yoq, er yer açıq. Şunıñ içün buña baqmañız, bir problem olğanına inanmañız», – dep ayta bloger.

Novofedorovkada tikenli tel, 2024 senesi iyünniñ 15-i

Plâjda raatlanğanlar Qırımnıñ cenübiy yalısında olğanlardan daa çoq edi. Rusiye arbiy vertolöti yuvunğanlarnı patrul ete. İnsanlar onı körip, cep telefonlarını çıqara ve fotoresim yapa.

Plâjda faal sürette biznes çalışa – aş yerleri, suv mototsiklleri ve attraktsionlar.

Açıq plâjlarğa baqmadan, Novofedorovkada tikenli tel ve «Kirmek yasaq – ayat telükesi» ilânı peyda oldı. Amma bazıları yasaqqa riayet etmey ve deñizge kirmek içün qoradan keçe.

Novofedorovkada tikenli tel, 2024 senesi iyünniñ 15-i

Eglence satqanlar raatlanğanlarnı banan ve kvadratsikllerge minmege çağırım, «bir adise yoq, er şey yolunda» dep işandıra.

«Stabil-kergin vaziyet»

İnsanlar bıltır, yerli Rusiye ava bazasındaki patlavlar daa unutılmağanda, Novofedorovkağa raatlanmağa kele edi. «Solneçnıy Krım» blogu 2023 senesi yazda Moskva, Krasnodar ülkesi ve diger Rusiye regionları, Beyazrusiye ve tanılmağan «DNR» nomeralı Ukrayına Donetskiniñ maşinalarınen plâj yanındaki turaqnı köstergen edi.

Qırımlı cenkke qoltutqan bloger Yevgeniy Şçepinskiy yarımadanıñ ğarbinde, hususan Novofedorovkada raatlanmağa istegen turistlerge yanındaki arbiy obyektlerni hatırlamağa tevsiye ete.

«Bir çoq insan 2022 senesi avgustnıñ 9-nda mındaki arbiy uçaq alanında, bu acayip plâjlarnıñ yanında, patlavlar olğanını daa unutmadı. E, patlavlar küçlü edi, tuman kökke qadar köterildi. İnsanlar başta ne olğanını añlamadı. Amma añlağanda qorqudan tez-tez azırlanıp, ketmege başladı. Ebet, epiñiz añlamaq kereksiñiz, Qırımdaki arbiy uçaq alanları ve arbiy bölükler – Ukrayına tarafından raketa darbelerini endirmek içün birinci nişanlar ola», – dep ayta o.

Bloger ondan Qırımdaki vaziyet aqqında soralğanda «stabil-kergin» dep cevap bergenini gizlemey.

«Resmiy kütleviy haber vastaları Qırımda er kün ava mudafaası çalışa dep az bildire. Amma raatlanmaq içün mında kelmegemi ya da regionındaki yazlıqta qalmağa, ya da Abhaziya, Gürcistanğa barmağamı qarar almalısıñız. Novofedorovkanı saylasañız, mında arbiy uçaq alanı bar. Müsbet ve menfiy taraflarını baqıñız», – dep qayd ete Yevgeniy Şçepinskiy.

«Mevsimni «mahsus arbiy operatsiya» iştirakçileri, soy-sopları ve tarafdarları yapacaq»

Cenk vaqtında Novofedorovka plâjlarında büyük sayıda insanlarnıñ bulunması turistik biznes saibi, Kezlev şeer şurasınıñ kurort ve turizm bölüginiñ baş mütehassısı Sergey Vikarçuknı şaşırtmay. Raatlanğan yerliler – «Qırım kurortlarınıñ muvafaqiyet resmini» kösterecek farqlı insanlar, dep tüşüne o.

Sergey Vikarçuk

«Mence, turistlerniñ çoqusı – «mahsus arbiy operatsiya» (Rusiye, 2022 senesi fevralniñ 24-nden başlap Ukrayınağa qarşı büyük ücümni böyle adlandıra – QA) iştirakçileriniñ soy-sopları ve tuvğanları ve Rusiye arbiyleri, «mahsus arbiy operatsiya» tarafdarları, z-yamâmları ve moskoviya natsistleri, içtimaiy turistler. Böyle insanlarnıñ tenqidiy fikirleri, temel bilgileri ve mantıqları yoq. Qırımdaki mevsim bu insanlardan ibaret olacaq», – dep ayta Qırım.Aqiqatqa Sergey Vikarçuk.

Rusiye akimiyeti cebege yaqın regionda bile «turğunlıq ve inkişaf» köstermege tırışa, şunıñ içün insanlarnıñ telükesizlik zararına «pozitiv resimni yapmağa» da istey.

Novofedorovka plâjı

Rusiyeniñ Ukrayınağa qarşı büyük istilâsı vaqtında eki kurort mevsimi – 2022 ve 2023 seneleri – Qırımda yaramay oldı. Qırımnıñ Rusiye akimiyeti 2024 senesiniñ mevsimi «qolay olmaycaq», birinciden logistika sebebinden, dep qabul ete.

Şimdiki mevsimniñ esas dubarası Keriç köprünen bağlı. Ukrayına Silâlı quvetleri onı Rusiyeniñ Ukrayınağa qarşı büyük istilâ vaziyetinde darbeler içün qanuniy nişan dep adlandıra. Ukrayına Silâlı quvetleriniñ bu köpür keçitine qarşı yapqan eki darbesine baqmadan, o, Rusiyeden kelgen raatlanğanlar içün esas yol ola.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.