Rusiye işğal etken Qırımda mektepni kelecek bazarertesine qadar (noyabrniñ 9-ı – QA) qapatmağa qarar alındı. Bu aqta Qırımnıñ Rusiye yolbaşçısı Sergey Aksenov bildirdi.
"Peyda olğan zor vaziyet sebebinden Qırım mekteplerinde tatilni uzatmağa qarar berdik. İlk malümatqa köre, derslerde talebelerni bazarertesi künü, noyabrniñ 9-nda, bekleycekler. Başqa ya da yañı deñişmeler aqqında qoşma malümat berilecek.
Aksenov Rusiye memuriyetleri bala bağçalarınıñ iş rejimi aqqında özleri qarar berecek – er şey operativ vaziyetke bağlı.
Aqyarnıñ Rusiye yolbaşçısı Mihail Razvojayev de mektepler qapatılacaq, dep bildirdi. Bala bağçaları şeerde işine devam etecek.
Cemaat müessiseleriniñ işini sıñırlamaq qararı Qırımdaki blekautnen bağlı. Qırımda Ukrayina uçucısızları Rusiyeniñ Krasnodar ülkesindeki ast stantsiyağa darbe endirgeni içün elektrika söndürilgen edi. Ukrayina Mudafaa quvetleri energetika obyektlerine qarşı ücümleri aqqında daa bildirmedi.
Hatırlatamız, oktâbrniñ 29-nda yarımadanıñ Rusiye ükümeti mektep, bala bağçaları, kollec ve aliy oquv yurtları içün 375,25 mln rublelik dizel generatorlarını aluv emrini berdi. Bunı yılnıñ soñuna qadar yapmaq kerekler. Rusiye memurları OOO "Stroytsentrni" yekâne hızmetçi olaraq belgilediler.
Qırımnıñ Rusiye Tasil nazirligi kompleks telükesizligi idaresiniñ yolbaşçısı Larisa İşçenko Qırım mektepleriniñ yarısından ziyadesi generatorlarnen temin etildi, yaqın vaqıtta böyle donatmalar qalğan tasil teşkilâtlarına berilecek, dep bildirgen edi. Qırım yaqınlaşqan qızdıruv mevsimine azırlanuv çerçivesinde qoşma olaraq 1500 yedek elektrik generatsiya cihazlarını alacaq, dep haber etilgen edi.