Qırımda Rusiye uquq qoruyıcıları patlayıcı saqlanğan yerini yapqanından ve Ukrayina arbiylerine Kezlevde Rusiye tehnikası aqqında malümat toplağanından şübheli sayğan eki kişini tuttı. Bu aqta avgustnıñ 31-nde Rusiye kütleviy haber vastaları Rusiye FSBsiniñ malümatına esaslanıp bildirdi.
Berilgen malümatqa köre, tutulğanlar Ukrayinağa qoltutuv şiarlarınen fotoresimler yaptı. Olarğa qarşı "devlet hainligi" ve "patlayıcını saqlav" maddelerine istinaden cinaiy davalar açıldı.
Tutulğanlarnıñ ad ve soyadları haber etildi. FSB derc etken videoda tutulğan kibi tanıtılğan bir er adam ve bir qadın Rusiye uquq qoruyıcılarınıñ malümatını isbatlay. Rusiye uquq qoruyıcılarınıñ malümatını diger menbalarda tasdıqlamaq imkânsız ola. Derc etilgen video basqı altında çıqarıla bile.
Ukrayina arbiyleri ve mahsus hızmetleri bu malümatnı izaatlamadı.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı olğan Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar RF ordusını "itibardan tüşürüv" içün yaqalana ve memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler. Şimdi FSB bu kibi davalarnı aman-aman er kün aça 2014 senesine qadar ise yılda 10 dava açıla edi.