İşğal etilgen Qırımda mayıs ayında Rusiye akimiyeti 11 tutuv ve 25 apiske aluv kerçekleştirdi, hususan dört qırımtatarını tutı. Bu aqta Qırım.Aqiqat incelegen Qırımtatar Resurs Merkeziniñ (QRM) esabatında aytıla.
11 sorğu ve "subet", 26 adaletli mahkeme aqqınıñ bozuluvı (5-i qırımtatarlarnen bağlı) ve eñ az 7 sağlıq aqqınıñ bozuluvı (5-i qırımtatarlarnen bağlı) qayd etildi.
Tutulğanlar arasında – 23 yaşında Aqyardaki tehnikum talebesi, onı messencerde yapqan izaatları içün "ekstremist faaliyetine çağırğanında" (Rusiye Federatsiyası Ceza kodeksinni 280-inci maddesiniñ 2-nci qısmı) qabaatlaylar.
Mayısnıñ 12-nde uquq qoruyıcılar Canköy rayonınıñ dört sakinini "İyegova şaatları" din teşkilâtınıñ faaliyetinde iştirak etkeninde şübheli sayıp tuttı.
Mayısnıñ 14-nde Rusiye akimiyeti Or Qapı rayonınıñ sakinini arbiy obyektlerniñ foto, video ve koordinatlarını yollağanı içün "devlet hainliginde" qabaatladı, Aqmescit sakini ise "Ukrayina mahsus hızmetleri ile işbirliginde" qabaatlanıp tutuldı.
Mayısta 59 yaşında Aqyarlı İgor Domçenko Telegramdaki izaatları içün ("rusiyelilerge qarşı zorbalıqqa çağıruv" qabaatlavı), 48 yaşında Aqmescitli "terror faaliyetine çağırğanı" içün, Aluşta sakini "Rusiyeniñ arbiy şanı timsallerini" aqaretlegeni içün ve "elnen yapılğan patlayıcı cihaz yardımınen demiryolnı patlatmağa azırlanğanında" qabaatlanğan 32 yaşında Keriç sakini tutuldı.
Qayd etilgenine köre, Rusiye mahkemeleri bir sıra üküm de çıqardı. "Hizb ut-Tahrir" davasınnı mabüslerine 14 yıldan 20 yılğa qadar koloniyada qaluv müddetleri belgilendi: Remzi Kurtnezirov 20 yıl, Nariman Ametov – 15, Enver Halilov – 14,5 yıl, Vohid Mustafayev ve Ali Mamutov – 14-er yıl aldı.
Canköy rayonınıñ 42 yaşında sakini "devlet hainliginde" qabaatlanıp, 17 yıl sert rejimli koloniyada qalmasına üküm etildi. Qırımnıñ eki sakini "devlet hainligi" ve "casuslıqta" qabaatlandı – erkekniñ azatlığı 17 yılğa sıñırlandı, qadın 15 yıl umumiy rejim koloniyasında qalmasına üküm etildi.
Qırımnıñ Rusiye Yuqarı mahkemesi Keriç sakini İgor Boykonı "devlet hainliginde" qabaatlap, 18 yılğa üküm etti. Roman Klukin "casuslıq" ve "terror teşkilâtında" iştirak etüvde qabaatlanıp, 22 yılğa üküm etildi, Kefeniñ 56 yaşında sakinine ise internette "terror faalitine açıq çağırğanı" içün 5,5 yıl apis cezası berildi.
QRM advokatlarnıñ şikâyet arizaları muntazam sürette red etile ve para cezaları çıqarıla, dep qayd ete.
Eñ az yedi Qırımlı siyasiy mabüsniñ tibbiy yardım aqqı bozuldı: Galina Behter, Galina Dovgopolaya, Vilen Temeryanov, Servet Gaziyev, Lenur Halilov, Ali Mamutov ve Osman Arifmemetov. Aq qorçalayıcılar apishanede sağlıqları fenalaşqanını, advokat muracaatlarınıñ körmemezlikke urulğanını ve tibbiy yardım kösterilmegenini qayd etti.