İşğal etilgen Qırımda «Hizb ut-Tahrir» islâm siyasiy firqasınıñ tarafdarlarına qargı repressiyalarnıñ sayısı arttı, dep bildirdi «KrımSOS» cemaat teşkilâtınıñ talilcisi Yevğen Yaroşenko «Suspilne» izaatında.
«Hizb ut-Tahrir azaları olma ihtimali olğan insanlarnıñ taqip etilüvi öyle bir seviyege çıqtı ki, Qırım (RF – QA) regionları arasında taqip sayısına köre üçünci yerde buluna», – dep qayd etti o.
Yaroşenko aytqanına köre, eki insandan ğayrı, Qırımda «Hizb ut-Tahrir davası» boyunca qabaatlanğanlarnıñ episi qırımtatarı ola.
«Yani «Hizb ut-Tahrir davaları», birinciden, Qırımda cemaat faaliyetinen küreş aleti ola, ekinciden, qırımtatarlarnı taqip aleti ve, üçünciden, kelişmegen musulman cemiyetlerini taqip aleti ola», – dep qayd etti talilci.
«Yekâne bir delil de tek tintüvler vaqtında gizliden qoyulğan edebiyat ola. Bu edebiyatnı sıq-sıq ayaqqap dolabına, aşhane dolabına qazanlar arasına saqlaylar… Bilgenime köre, musulmanlar diniy edebiyatnı böyle yerlerde tutmay», – dep qoştı Yaroşenko.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede, hususan işgali altındaki Qırımda adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.