Rusiye akimiyeti "çetel agenti" olaraq taığan "Qırım birdemligi" aq qorçalayıcı areketi siyasiy basqı sebebinden işini toqtata. Böyle beyanat teşkilâtnıñ saytında derc etildi. Rusiye Adliye nazirligi areketni çetel agentleri cedveline kirsetkenine aman-aman bir ay toldı.
"Bu qararnı siyasiy basqı olaraq köremiz – faaliyetimizni izolâtsiyağa oğratmağa ve itibardan tüşürmege tırışqan bir yarlık, mustaqil cemaat, kerçekten halq areketine basqını quvetleştirmege isteyler. Yıllar devamında Qırımda insanlarnı qorçaladıq, siyasiy mabüslerniñ qorantalarına qoltuttıq ve yarımadada olıp keçkenlerni aydınlattıq. Bu yıl teşebbüsimiz 10 yılını toldurdı – er künlik bağ, basqı, tintüv, apis ve ğayıp şaraitleyerinde insanlarğa qoltutuv, birdemlikni yoq etmege tırışqan yerlerinde onı saqlav yılları. Bu yıllar devamında Qırımda taqip etilgen insanlarnıñ ikâyelerini qayd ettik, tutulğan ve apiske alınğanlarnıñ qorantalarına qoltuttıq, uquqiy imayenen yardım ettik ve resmiy kün tertibinde olmağan malümatnı tarqattıq.
Siyasiy repressiyalarnıñ qurbanlarına yardım etken bir çoqumız para cezaları, memuriy apis cezaları aldıq ve cinaiy taqipke oğradıq. İşdeş ve dostlarımız – aq qorçalayıcı, jurnalist ve göñülliler – bugünge qadar apiste qala. Bu faaliyetni akimiyet "çetel agentiniñ" faaliyeti dep adlandırdı ve bu qararnıñ sebebi o oldı", – dep aytıla beyanatta.
Teşkilâtnıñ qayd etkenine köre, özara yardım, uquqiy qoltutuv ve cemaatnı açıq haberdar etüvge esaslanğan faaliyetleri "çetel agenti" yarlıqı içün sebep olmamalı.
"Qanunlarnı diqqatnen tedqiq etip, cemaat areketimizniñ faaliyetini toqtatmağa qarar berdik. Bu qarar pek zor oldı. "Qırım birdemligi" on yıl içinde tek teşebbüs olmadı, qoltutuv, işanç ve bir-biriniñ ögünde mesüliyet toplulığı oldı. Lâkin bu vaziyette bu adımnı kerekli dep sayamız", – dep aytıla beyanatta.
Teşkilâtnıñ saytı ve içtimaiy ağlardaki saifeleri yañartılmaycaq, dep qayd etildi. Teşkilâtçılar areketniñ faaliyeti toqtatıldı, dep bildirdi.