Rusiye işğal etken Qırımda yanğan benzin taşıyıcısı qayd etildi. Bu aqta "Krımskiy veter" Telegram kanaları uydularnıñ yanğın monitoringi video ve malümatına esaslanıp haber ete.
Saifede qayd etilgenine köre, benzin taşıyıcısı Qarasuvbazar rayonınıñ Bağça Eli (Bogatoye) köyüniñ çıqışında, "Grifon" yaqarlıq stantsiyası yaqınlarında tura.
Qırımnıñ Rusiye Fevqulâde vaziyetler hızmeti yanğan benzin taşıyıcısı aqqında bildirmedi. Qurtarıcılarnıñ malümatına köre, olar 4 yanğınğa çıqtı, ekisi araba edi. Yanğan şeylerni zararsız alğa ketirmek içün yanğıncılar eki kere celp etildi.
Qırım.Aqiqat haber etkenine köre, Ukrayina Silâlı quvetleri "Rostov-na-Donu – Aqmescit" yolunda benzin taşıyıcıları, naqliyat ve Rusiye Federatsiyası Silâlı quvetleriniñ tehnikasına ücüm ete.
Hatırlatamız, Qırımnıñ Rusiye yolbaşçısı Sergey Aksenov bildirgenine köre, Azovskoyeden Keriçke ketken trenge uçucısız ücümi neticesinde bir insan elâk oldı ve üç kişi yaralandı. Ukrayina Silâlı quvetleriniñ Baş ştabı bu malümatnı cenk vaziyetinde teşkerip olamay.