Sinoptikler Qırımda cumaaqşamı künü, iyülniñ 8-nde, sıcaq ve quru ava başlaycaq, dep tahmin eteler. Bu aqta Qırımnıñ Gidromettsentri bildirdi.
«Küçlü yağmurlar yarımadada iyülniñ 7-ne qadar yağacaq. İyülniñ 8-nden itibaren sıcaq, esasen quru ava olması beklenile. Kündüzleri ava arareti +28…+33°, gece +18…+23°, yalı boyunda +25° olacaq. Qırımnıñ cenübiy yalısında deñiz suvınıñ arareti +22…+24°, ğarbiy yalıda +22°, şarqiy yalıda +23°, Azaq deñizinde +26° olacaq. Afat «ücümlerine» baqmadan, sıcaq Qırım yazı devam ete», – dep aytıla haberde.
Bir kün ögüne Qırımnıñ Rusiye Fevqulâde vaziyetler nazirligi iyülniñ 7-nde kün devamında küçlü sağanaqlar, boranlı yağmur, bazı yerlerde burçaq yağması beklenile, yel süratı saniyede 20-25 metr esecek, dep tenbilegen edi.
Yağanaqlar sebebinden Qırımda iyülniñ 4-nde Bağçasaray rayonındaki bir sıra meskün yerni suv bastı. Akimiyet suv taşqını sebebinden fevqulâde vaziyet rejimini kirsetti.
Bundan evel Qırımnıñ Rusiye Fevqulâde vaziyetler nazirliginiñ idaresi 2021 senesi iyünniñ 16-ndan 18-ne qadar küçlü yağanaqlar sebebinden Yaltada ve şarqiy Qırımda 426 azbarnı, 356 evni, 18 içtimaiy ceetten müim obyektni suv bastı, dep bildirgen edi. Umumen suv basqan yerlerden 1783 kişi tahliye etildi.