Sentâbrniñ 16-nda aqşamdan ve sentâbrniñ 17-nde gece Qırım ve Aqyarda patlav, dron uçuşları ve atış sesleri eşitildi. Bu aqta Rusiye akimiyeti ve yerli Telegram kanalları haber ettiler.
Rusiye kontrolindeki Aqyar şeer yolbaşçısı Mihail Razvojayev saat 20:31-den 21:58-ge qadar ava telükesini ilân etken edi. Onıñ aytqanına köre, şeer dron ücümlerine oğradı, Rusiye arbiyleri olardan yedisini urğan eken. Tüşürilemegen uçucısızlarnıñ sayısını Razvojayev bildirmedi
"Krımskiy veter" Telegram kanalı yerli sakinlerniñ malümatına esaslanıp, şeerde eñ az dört patlav oldı, dep bildirdi. Soñra Felenk burnu civarında ve "Belbek" Rusiye arbiy uçaq alanı civarında patlavlar aqqında haber etildi.
Bundan ğayrı, gece "Krımskiy veter" Bağçasaray rayonında Saq tarafından patlav sesleri ve Or Qapı rayonı, İçki qasabası ve Eski Qırımda uçucısız uçuşları aqqında yazdı.
Ukrayina arbiyleri bu ücümlerni şimdilik izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.