Gece Qırım ve Aqyarda dron uçuşları eşitildi, Rusiye mobil ateş gruppaları ve ava mudafaası çalıştı, çoq patlav oldı, ücüm vaqtında beş qatlı çoq daireli ev zarar kördi – bu aqta yerli haber saifeleri ve Rusiye akimiyeti bildire.
“Krımskiy veter" Telegram kanalı yerli sakinlerniñ malümatına esaslanıp haber etkenine köre, Keriçte (22:30) ve İslâm Terek rayonında (22:31 ve 00:03) patlavlar eşitildi. "Krımskiy veter" Aqyarda patlavlar aqqında yazdı: "Belbek" uçaq alanı rayonında (00:20), Felenk burnunda (00:41) ve Qamış körfezindeki limanda (00:15).
Aqyarnıñ Rusiye akimiyeti ava telükesini üç kere ilân etip, "arbiyler Ukrayina Silâlı quvetleriniñ ücümini keri qaytara, ava mudafaası ve mobil ateş gruppaları çalışa".
Aqyarnıñ Rusiye kontrolindeki şeer yolbaşçısv Mihail Razvojayev telegram kanalında yazğanına köre, gece ücümi vaqtında "Geroyev Podvodnikov soq., 12 adresindeki çoq daireli beş qatlı ev pek zarar kördi. Patlav dalğasından №34 bala bağçasınıñ eki korpusı ve 15 maşina zarar kördi.
Qırım.Aqiqat cenk şaraitinde bu malümatnı mustaqil sürette teşkerip, tasdıqlayalamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.