İyünniñ 4-ne keçer gecesi işğal etilgen Qırım ve Aqyar uçucısız ücümine oğradılar. Küçlü patlavlar bir çoq obyektte, hususan Rusiyeniñ arbiy uçaq alanlarında oldı. Rusiye akimiyeti ücüm neticesinde elâk olğan ve yaralanğanlar aqqında bildire. Keriç köprü naqliyat areketi içün qapatıldı.
"Krımskiy veter" Telegram kanalı abunecileriniñ malümatına esaslanıp haber etkenine köre, ilk küçlü patlavlar ve Rusiye ava mudafaasınıñ işi saat 22:32-de Aqmescitte Tavriya TES ve Aqyarda "Kaça" uçaq alanı ve Felenk burnu tarafında eşitildi.
"Krımskiy veter" saat 22:58-de Aqmescitte GRES qasabasına yaqın dört patlav ve atış aqqında bildirdi, anda TES yaqarlıq stantsiyalar ağına ait eki cermay bazası yerleşe. Telegram kanalı yazğanına köre, "saat 23:44-te Aqmescit merkezinde Rusiye arbiy bölügine darbe endirildi", "acele yardım" maşinaları anda doğru ketti.
Qırımtatar Milliy Meclisiniñ reisi Refat Çubarov Telegram kanalında yazdı: "İşğal etilgen Qırımda bu gece pek sesli. Aqmescit şeerinde Sevastopolskaya soqağı civarında arbiy obyektlerge ücüm aqqında haber etile. QMPU-ğa yaqın arbiy bölükler ve Aqmescitte çıqışındaki "Zavodskoye" eski ava limanı yaqınlarında arbiy bölükler aqqında aytıla.
Uçucısızlar "Gvardeyskoye", "Belbek" Rusiye arbiy uçaq alanlarına da ücüm etti, saat 23:54-te "Saki" uçaq alanı civarında küçlü bir patlav oldı. Bu uçaq alanlarında ve "Kaça" uçaq alanında gece boyu patlavlar oldı.
Felenk burnunda da 15 daqqa içindde 5 ya da 6 küçlü patlav oldı, "Aqyarda Zafer parkı rayonında darbe oldı".
"Krımskiy veter" haber etkenine köre, Aqmescitte yarı geceden soñ "Uhtomskiy soqağındaki arbiy yaqarlıq bazasına ücüm etildi, tuman köterile".
Uçucısız ücümi sebebinden Keriç köprü naqliyat areketine qapatıldı. Keriçte 6 küçlü patlav eşitildi.
Küçlü patlav Kefede saat 04:50-de oldı.
Qırımnıñ Rusiye yolbaşçısı Sergey Aksenovnıñ haber etkenine köre, "ilk malümatqa köre, üç kişi elâk oldı, yedi insan yaralandı. Adise yerinde acele hızmetler çalışa".
Aqyarda ava telükesi saat 22:08-de ilân etildi. Aqyarnıñ Rusiye yolbaşçısı Mihail Razvojayev Telegram kanalında haber etkenine köre, Rusiye "arbiyleri Ukrayina Silâlı quvetleriniñ ücümini keri qaytara, mobil ateş gruppaları çalışa". Yarı geceden soñ o, "Şimaliy taraf, Streletskaya körfezi ve İnkerman rayonında 20-den ziyade uçucısız urıp tüşürildi" ve "Şimaliy tarafta uçucısız parçaları tüşkeni içün eki qatlı mustaqil evniñ damı yana. Kimse yaralanmadı", dep bildirdi. Saat 02:52-de ava telükesi ilân etildi.
Ukrayina ve Rusiye arbiyleri bu malümatnı izaatlamadılar.
Qırım.Aqiqat muarririyeti cenk vaziyetinde bu malümatnı mustaqil şekilde teşkerip olamay.