Rusiye işğal etken Qırımda qırımlılarnıñ başına bir mesele daa keldi – Rusiye akimiyeti bala bağçalarını qapata ya da normal işini temin etemegeninden üylege qadar çalıştıra. Bu aqta qırımlı faallerden biri adını gizlemek şartınen Qırım.Aqiqatqa tarif etti.
Onıñ malümatına köre, bu vaziyet Qırımnıñ bir çoq yerinde elektrik ve suv söndirüvleri kontrol etilemegeni içün peyda oldı.
"Bir çoq bala bağçası yerli memuriyetniñ qararınen qapatıla. Ermeni Bazar, Or Qapı, Kezlevden çoq haber kele – anda suv yoq, ana-babalarğa sentâbrniñ 1-ne qadar balalarnı bağçağa ketirmeyceklerine dair ariza imzalatalar. Aqmescitte bir çoq bala bağçası saat 12-ge qadar çalışacaq, çünki balalarnı keregi kibi aşatamaylar. Bu vaziyet Qırımnıñ diger şeerlerinde de bar. Körgenimiz kibi, büyük cenkniñ beşinci yılında Qırım ihtimal telükelerge azır degil", – dep ayttı faal.
Onıñ qayd etkenine köre, Qırımdaki vaziyet ket-kete zorlaşa, Rusiye memurları ve akimiyet organlarınıñ içtimaiy ağlarındaki izaatlarnı temizlep başladılar.
"Vaziyet akimiyet kontrolinden çıqtı. Biñlernen qırımlı zaten zor vaziyette qaldı, şimdi bala bağçaları da qapatıla. Çalışqan ana-babalar ne yapacaq? Er kesniñ ana-babası işte olğanda balalarnı baqacaq büyük balası ya da qartanası yoq. Sistema sanki tökülip kete, insanlarnı ise sağ qalmaq içün küreşmege qaldıralar. İdareciler ükümran firqanıñ reytingi tamamen yıqılıp dep, bala bağçalarındaki vaziyetnen bağlı izaatlarnı temizley", – dep qayd etti aq qorçalayıcı.
Qırımlılar içtimaiy ağlarda bala bağçaları qapatılmağa devam ete, dep yaza.
"Olmaycaq şey. İyünniñ 29-ndan başlap bir qaç köyge bir olğan bala bağçası qapatıldı, ne qadar çalışmaycaq belli degil", – dep yaza qırımlı Anna.
Aqyardaki bala bağçalarınıñ işi daa zor. Şeer akimiyeti bala bağçalarınıñ bir qısmını elektrikler olmağanı içün hususiy rejimge keçirdi, bu bala bağçaları nevbetçi gruppalar rejiminde çalışacaq. Al-azırda Aqyarda 75 bala bağçasından 24-ü çalışa.
İşğal etilgen Qırım bir qaç künden berli fevqulâde vaziyet rejiminde yaşay. Yerli Rusiye akimiyeti onı Ukrayina Mudafaa quvetleriniñ Rusiye logistikası ve infrastrukturasına qarşı ücümleri sebebinden yaqarlıq qıtlığı ve elektriksizlik sebebinden ilân etti. Biñlernen qoranta tezden parasız qala bile. Qırımda qırımlılar Rusiye akimiyetinden memnün qalmağanlarını içtimaiy ağlarda bildire. Bir çoq ekspert ve adiy qırımlı bu vaziyette Qırımdaki yaşayış daa beter olacaq, dep tüşüneler.