Qırımda Qırım.Aqiqat saytınıñ ukrain ve qırımtatar versiyaları açılmay. Bu aqta muarririyetimizge Qırımdaki oquyıcılarımız bildire.
Ktat.krymr.com ve ua.krymr.com saifeleri açılğanda «Saytqa irişilmey» dep yazıla. Olar tek Qırımda degil, qomşu Rusiyede de açılmay.
Qırım.Aqiqat saytınıñ rus tilli versiyası kirsetilgen Roskomnadzornıñ yasaqlağan saytlar cedvelinde ukrain ve qırımtatar saifeleriniñ blok etilüvi aqqında malümat yoq.
VK, «Odnoklassniki» ve «Yandeks.Dzen» Rusiye içtimaiy ağları Roskomnadzornıñ talabınen Azatlıq Radiosınıñ rus hızmeti ve Nastoyaşçeye Vremâ saifelerini blok etti.
Serbest Avropa Radiosı/Azatlıq Radiosınıñ prezidenti Jamie Fly yañı sıñırlavlarnı izaatlap, Kremlge mustaqil kütleviy haber vastaları saytlarınıñ blok etilüvi yetmedi ve anda «Putin içün kelişmegen Ukraina cenki aqqında bütün malümatnı temizlemege» qarar berildi: «Kontentimizni blok etmek içün Putin rejimi alğan tedbirlerge baqmadan, Azatlıq Radiosı Rusiyedeki oquyıcılarına kerçeklerni bildirmek içün elimizdeki bütün resurslarnı qullanmağa devam etecek».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.