Dünyanıñ çoqusı memleketi tarafından tanılmağan Rusiyeniñ Qırım referendumı yılında "Sarı şerit" areketiniñ faalleri Qırım yarımadasında Ukrayinağa qoltutuv aktsiyasını keçirdi. Bu fotoresim areketniñ Telegram kanalında derc etildi.
"2014 senesi martnıñ 16-nda sözde referendum keçirdiler – silâ altında, Rusiye arbiylerinen ve qanuniy bir sebep olmağanda. Bu bir saylav degil edi. Bu bir oyun edi, Ukrayina Qırımınıñ işğalini qapatmağa tırışqan demokratiya oyunı. "Sarı şerit" areketiniñ faalleri bildirgenine köre, iç bir sahte risale, raqamlar ve propaganda Qırım Ukrayina olğanını deñiştirmeycek!", – dep yazdı fotoresim altında faaller.
Rusiye akimiyeti ve Qırımdaki uquq qoruyıcılar bu aktsiyağa şimdilik cevap bermediler.
2014 senesi fevral ayında işaretsiz urbada silâlı insanlar Qırım Muhtar Cumhuriyetiniñ Yuqarı Şurası, Nazirler Şurası, Aqmescit ava limanı, Keriç parom keçiti, diger strategik obyektlerni zapt etken ve Ukrayina ordusınıñ areketlerini blok etken edi. Rusiye akimiyeti bu silâlı insanlarnıñ Rusiye ordusınıñ arbiyleri olğanını qabul etmegen edi. Soñra Rusiye prezidenti Vladimir Putin bu Rusiye arbiyleri olğanını qabul etti.
2014 senesi martnıñ 16-nda Qırım ve Aqyarda çoqusı memlekette tanılmağan Qırım referendumı olıp keçti, Rusiye Qırımnı qanunsız bir şekilde ilhaq etti. Ne Ukrayina, ne Avropa Birligi, ne de ABD bu rey berüvniñ neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege "qoşulğanını" ilân etti.
Halqara teşkilâtlar Qırım işğali ve ilhaqını qanunsız tanıp, Rusiyeniñ areketlerini takbih etti. Ğarp memleketleri iqtisadiy sanktsiyalar kirsetti. Rusiye yarımada ilhaqını inkâr etip, bunı "tarihiy adaletniñ tiklenmesi" dey. Ukrayina Yuqarı Radası Qırım ve Aqyarnıñ Rusiye tarafından vaqtınca işğaliniñ başlanğıç künü olaraq 2014 senesi fevralniñ 20-ini ilân etti.