Rusiye Federatsiyası Silâlı quvetleriniñ arbiyleri işğal etilgen Mıkolayıv vilâyetindeki Qıl Burnunı terk ete. Bu aqta "Ateş" partizan areketi "Dnepr" ordusı gruppirovkasınıñ ştabından casusınıñ malümatına esaslanıp bildire.
Onıñ aytqanına köre, Ukrayina Mudafaa quvetleriniñ temin yollarını kesüv areketleri rusiyelilerni Qıl Burnundan ketmege mecbur etti.
"337-nci polk bölükleri mevzilerini terk ete – teminlev bütünley toqtatıldı. Silâ, yaqarlıq ve aş ketirilüvi toqtatıldı. Askerleri büyük sayıda ölgeni içün 337-nci polk bölükleri yalıdan uzaqlaştırıla – burunnıñ şimaliy ve ğarbiy qısımlarından. Ateş gruppaları uçucısızlarnı urıp olamay ve ğayıpları artmağa devam ete. Arbiylerniñ bir qısmı Zaporijjâ yönelişine avuştırılğan soñ qalğan bölüklerniñ askerleri qalmadı. Bir ilâve olmadı", – dep aytıla haberde.
"Ateşniñ" malümatına köre, komandanlıq insanlarnı bir mevziden alıp digerine ata, burunda ise tek mudafaanı qorup olamağan bölükler qala.
Ukrayina Cenübiniñ Mudafaa quvetleri spikeri Vladıslav Voloşin UNIAN izaatlarında Ukrayina Silâlı quvetleriniñ bölükleri vaqtınca işğal etilgen Herson vilâyeti topraqlarına uçucısızlarnen ücüm ete, dep añlattı.
Qıl Burnunıñ esasen qaradan logistik bağlantıları bar. Şunıñ içün rusiyeliler logistik yollarnı qullanmamağa tırışa, çünki olar Ukrayina Silâlı quvetleri uçucısız darbelerine oğray.
"Şunıñ içün bir qaç künden berli Rusiye naqliyatı, Rusiye logistikası içün yollar bayağı zorlaştı. Vaqtınca işğal etilgen Herson vilâyeti topraqlarında, istihbaratımıznıñ malümatına köre, Rusiye bölükleriniñ naqliyat ve generatorlar içün yaqarlıqnen bağlı problemleri bar. Bu zorluqlar eki-dört kün ve daa ziyade devam ete", – dep añlattı Voloşin.
Rusiye Federatsiyası Mudafaa nazirligi malümatnı izaatlamay. Qırım.Aqiqat muarririyeti cenk vaziyetinde bu malümatnı tasdıqlap ya da inkâr etip olamay.