Qırımnıñ suv techizatı ceetinden eñ yahşı olğan ve yarımadanıñ cenübiy-şarqiy qısmı içün suv bergen Qarasuvbazar rayonında havuzlar emiyetli derecede saylaştı. Bunı oktâbrniñ 19-nda Qırım.Aqiqat mühbiri haber etti.
Qarasuvbazar suv anbarındaki suv bentniñ tübünden pek uzaqlaştı. Ve bu, suv anbarınıñ Qırımdaki Karasu-Başi özeniniñ eñ büyük menbası qadalandırılmasına baqmadan.
Saylaşqan Taygan suv anbarı, 2021 senesi
Qarasuvbazar ve Taygan suv anbarlarında suv seviyesiniñ aşağı olması sebebinden Qarasuvbazardan aqqan Büyük-Qarasu özenine suvnıñ aqtarılması toqtıtıldı. Neticede özen suvsız qaldı, demek mümkün.
Qarasuvbazar yaqınlarındaki saylaşqan Biyuk-Qarasu özen yatağı
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.