Rusiye Federatsiyası öz gemilerini ukrayin suv üstü dronlarından qorumaq içün Novorossiysk körfeziniñ kirişinde dört barja yerleştirdi. Bu aqta Büyük Britaniya istihbaratı, uydu resimlerine atıf etip bildire. Britaniya mudafaa nazirliginiñ tahmin etkenine köre, Rusiye Federatsiyasınıñ Qara deñiz flotunıñ yañı komandanı Sergey Pinçuknıñ qararı böyle oldı, o, prezident Vladimir Putin, Ukrayinanıñ flotuna muvafaqiyetli ücümleri sebebinden, onıñ sabıq yolbaşçısı Viktor Sokolovnı istifağa yollağan soñ vazife aldı.
Latest Defence Intelligence update on the situation in Ukraine – 31 March 2024. Find out more about Defence Intelligence%27s use of language: https://t.co/LUxw0AkKb8 #StandWithUkraine 🇺🇦 pic.twitter.com/19Ym79ET6k
— Ministry of Defence 🇬🇧 (@DefenceHQ) March 31, 2024
Ukrayina ücümleri Rusiyeni Qara deñiz flotunıñ eñ qıymetli aktivlerini Novorossiyskke avuştırmağa mecbur etti, dep aytıla Büyük Britaniya istihbaratınıñ malümatında.
Buña ait qıymet kesüvler Ukrayina arbiy mahkemesinde de seslendirilgen edi. Martnıñ 30-nda Ukrayina Arbiy-deñiz quvetleriniñ spikeri Dmıtro Pletençuk Rusiye Federatsiyasınıñ Qara deñiz flotunıñ aman-aman bütün erkânı Qırımnı terk etkenini bildirdi.
"Cenk birlemleriniñ çoqusı, qanatlı raketa taşıyıcılarını alsaq, kerçekten de episi, qanatlı raketa taşıyıcı sayılsa da, bir raketanı daa ateşlemegen bir muvafaqiyetsizden ğayrı, başqa yerge avuştırıldı", - dedi Pletençuk.
Rusiyeniñ Qara deñiz flotu Qara deñizde yürmege cesaret etmey, Ukrayina ise aşlıqnıñ berilmesini blok etti. Bunı Büyük Britaniya mudafaa naziri Grant Şapps bildirdi.
Ever since Putin callously ended the Black Sea Grain Initiative designed to feed the world%27s most vulnerable people, Ukraine has focussed on sinking Russia%27s Black Sea Fleet. As my friend @OlKubrakov explains, Ukraine grain exports are booming & Russia%27s Fleet dare not set sail! https://t.co/5aq8ngZpC4
— Rt Hon Grant Shapps MP (@grantshapps) March 29, 2024
Şapps ukrayin ükümetiniñ aşlıq koridorınıñ işi aqqında esabatını tarqattı, anda yedi ay içinde 38 million tonna yük keçkeni qayd etile.
Qara deñizde olıp keçkenlerni diger memleketlerniñ deñiz quvetleri diqqatnen közeteler, dep qayd ete Avropada ABD topraq quvetleriniñ sabıq komandanı, istifağa çıqqan general Ben Hoces.
Ben Hoces
"Ukrayinler deñizde, eñ azından Qara deñiz ya da Baltıq deñiz kibi qapalı suvlarda cenkniñ hususiyetini deñiştirdiler", – dep qayd etti Hoces Silicon Curtain intervyüsında.
Onıñ qayd etkenine köre, gemiler arasındaki ananeviy uruşlardan farqlı olaraq, ukrayinler Rusiye flotuna qarşı yañı ve uyğunlaştırılğan tehnologiyalarnı, sabotaj üzre mahsus operatsiyalarnı qullandılar.
Rusiye Federatsiyasınıñ "İvanovets" kateriniñ suvğa batqan vaqtı
Ukrayinlerniñ muvafaqiyetleri Qara deñiz flotunıñ yetersiz azırlığını ve imkânlarını köstere. Hocesniñ fikirince, Rusiye flotu "bu zıddiyetniñ ilk künlerinde Rusiye qara quvetlerinden daa yahşı degil edi".
Hoces, ukrayinler Keriç (Qırım) köprü bozulğan taqdirde Azaq deñizinde taşımalar içün qullanıla bilecek büyük logistika gemilerine, em de Rusiye gemilerni tamir ete bilecek Aqyar civarındaki qara limanğa ücüm etkenlerini yüksek qıymetlendirdi.
Hoces şunı da qayd ete ki, Rusiye flotunıñ çekilüvi Vladimir Putinniñ, Rusiye Qırımnı ğayıp etse, özek silâsını qullanmaq niyetinde olğanına şübe doğura.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.