Ukrayına prezidenti Volodımır Zelenskıy Kreml yolbaşçısı Vladimir Putinniñ ateşni toqtatuv şartları beyanatına cevap berdi.
«Bu ultimatumlar aqqında ne aytmaq mümkün? Daa evel aytılğan ultimatumlardan pek farqı yoq. Şimdi natsizmniñ ğayrıdan yaratıluvı olğanını köremiz. Bu natsizmniñ yañı dalğası, çünki rus natsizmi. O, toqtaycaq ve buzlatılğan zıddiyet olmaycaq, dep ayta. Gitler de aynısını yapqan edi, 100 yıl daa keçmedi», – dep ayttı Zelenskıy Sky TG24 intervyüsı vaqtında.
Ukrayına prezidenti Kyiv bu tekliflerge inanıp olamay, «çünki Putin aynı yoldan kete», dep ayta.
«Bugün 4 vilâyet aqqında ayta, bundan evel Qırım ve Donbasnı aytqan edi… bu natsizmniñ yañı yüzü. Eminim, dünyada bu tam natsizm degil dep aytqanlar bar, mence, bu dalğa kelecegini beklemek kerekmey. Mence, natsizm endi keldi ve şimdi Putinniñ beti bar», – dep qoştı Zelenskıy.
Vladimir Putin Ukrayınada barışıq muzakereleriniñ şartlarından biri Qırım ve Aqyar, Donetsk, Lugansk, Herson ve Zaporijjâ vilâyetleriniñ Rusiye Federatsiyasınıñ subyektleri halqara tanılmasını ayttı.
Putin barışıq muzakereleri içün diger şartlar olaraq Donetsk, Lugansk, Herson ve Zaporijjâ vilâyetlerinden Ukrayına ordusınıñ çıqarıluvını, Ukrayınanıñ NATOğa qoşulmasından vazgeçüvini, Ukrayınanıñ «askeriysizleştirilüvi» ve «denatsifikatsiyasını» ayttı. Putinniñ aytqanına köre, Rusiye bu vaziyette «yarın bile muzakere masasına oturmağa azır».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.