Rusiye prezidenti Vladimir Putin kütleviy haber vastalarında «yañlış» haberlerniñ blok etilüvi ve para cezaları, internette akimiyet ve devlet timsallerine sayğısızlıq içün para ve apis cezaları aqqında qanunlarnı imzaladı.
Vesiqalar uquqiy malümat portalında derc etildi, dep bildire Azatlıq Radiosınıñ rus bürosı.
Birinci vesiqa internette «vatandaşlarnıñ ayatı ya da sağlığı, mal-mülki içün telüke ketirgen, cemaat nizamı ya da cemaat telükesizligini bozğan» ve «yaşav obyektleriniñ işine mania olğan» yañlış malümatnıñ kerçek kibi tarqatılmasını yasaq ete.
«Yañlış» malümat paylaşqan vatandaşlarnı 100 biñ ruble, memurlarnı 200 biñ rublege qadar, şirketlerni ise yarım million rublege qadar para cezaları bekley. Tekrar bozuv ya da yaşav destegi, sanayı ya da banklarnıñ işine keder etken «yañlış» malümat paylaşuvı içün şirketlerge berilecek para cezası bir buçuq million rublege qadar yete bile.
«Akimiyetke nisbeten edepten tış şeklinde sayğısızlıq içün» qırımlılar ilk sefer 15 kün memuriy apis cezasını ya da 30 biñden 100 biñ rublege qadar para cezası, ekinci kere – 100 biñden 200 biñ rublege qadar para cezası, üçünci kere – 200 biñden 300 biñ rublege qadar para cezasını ala bile.
İşbu qanun leyhalarını Devlet dumasına Rusiye Federatsiya Şurasınıñ qanunlar komitetiniñ reisi Andrey Klişas, deputatlar Lüdmila Bokova ve Dmitriy Vâtkin tarafından kirsetilgen edi. Olar martnıñ 7-nde parlament tarafından qabul etildi. Daa soñra Rusiye Federatsiya Şurası olarğa qoltuttı.
Prezidentniñ insan aqları şurası ve diger aq qorçalayıcı teşkilâtlar qanun leyhalarını lâğu etmege çağırğan edi.
Aq qorçalayıcılarnıñ fikirince, yañı Rusiye qanunına köre qırımlılar Rusiye akimiyet organları, Rusiye timsallerine qarşı sayğısız ibareler qullanğanı içün ve ukrain kütleviy haber vastalarınıñ haberlerini paylaşqanları içün cezalandırıla bile.