Rusiye lideri Vladimir Putin dört künlik Qıtay ziyaretinden soñ Ukrayina prezidenti Volodımır Zelenskıynen şahsiy körüşüv imkânını izaatladı. O, Zelenskıy Rusiyeniñ paytahtına kelmege «azır olsa», böyle körüşüv Moskvada ola bile, dep bildirdi.
«Donald [Trump], mümkün olsa, böyle körüşüv keçirmege rica etti. Zelenskıy Moskvağa kelmege azır olsa, böyle körüşüv olur», – dedi Putin Pekindeki matbuat konferentsiyasında.
O, Zelenskıynı qanuniy prezident olaraq saymağanını ima etti: «Memuriyetniñ şimdiki yolbaşçısınen körüşüv keçirsek, bu neticesiz bir yol olur. Mümkün. Bundan bir vaqıt vazgeçmedim, bu körüşüv yahşı azırlansa ve müsbet bir neticege ketirse», – dedi Putin.
«Aqıl yeñse, zıddiyetni toqtatuv aqqında añlaşmaq mümkün, men buña baqam. Em de Trumpnıñ memuriyet keyfini köremiz, tek çağıruvlarnı degil, bir çezüv tapmağa isteyegenlerini köremiz. Vaziyet nasıl olur baqacaqmız. Olmasa, vazifelerimizni silâlı yolnen çezmege kerek olur», – dep qoştı Kreml yolbaşçısı.
Ukrayina prezidenti Volodımır Zelenskıy Putinnen şahsiy körüşüvge azır olğanını bildirgen edi. «Ukrayina beyanatlarnı deñişüv ve tehnik derecede körüşüvlerden liderlerniñ subet seviyesine keçmege teklif ete. Amerika bunı teklif etken edi. Ukrayina buña qoltuttı. Rusiyeniñ azırlığı kerek. Ukrayina liderler seviyesinde körüşüvge azır olğanını tasdıqlay», – dep ayta o.
Putin ve Zelenskıy, soñra ise ABD, Ukrayina ve Rusiye liderleriniñ iştirakinen üç taraflı körüşüvni ABD prezidenti Donald Trump Putinnen avgustnıñ ortasında Alâskada körüşken soñ tahmin etti.
Bir qaç Avropa memleketi ve Türkiye böyle körüşüvni teşkil etmege teklif etken ediler, yer olaraq Macaristan ve İsviçre aytıldı.
İsviçre Tış işler nazirligi Putinge Ukrayinadaki barışıq muzakerelerinde iştirak etmege kelse, Gaagadaki Halqara ceza mahkemesiniñ taqiplerinden immunitet bermege söz berdi.
Amma buña cevap olaraq bir qaç Kreml vekili, hususan Putinniñ yardımcısı Yuriy Uşakov bir qaç kün evelsi eki siyasetçiniñ körüşüvi aqqında bir añlaşma olmadı, dep bildirdi. Alâskadaki körüşüvde iştirak etken Uşakov şunı ayttı: «Bilgenime köre, Putin ve Trump arasında böyle añlaşma olmadı».
Türkiye prezidenti Recep Tayyip Erdoğan Qıtayda Şanhay işbirligi teşkilâtından qaytqan soñ jurnalistlerge Putin ve Zelenskıy «şimdilik körüşüvge azır degiller», dep ayttı.
Putin Zelenskıyge endi ekinci kere Moskvada körüşmege teklif ete. Birinci teklifini Ukrayina prezidenti kesen-kes red etti.