Cumaaqşamı kününe keçer gecesi Rusiye prezidenti Vladimir Putin Ukrainada «mahsus arbiy operatsiya» başlatqanını ilân etti. Onıñ maqsadı olaraq «sekiz yıl devamında çekiştirilgen ve Kyiv rejimi tarafından genotsidke oğratılğan insanlarnı qoruv», «Ukrainanı silâdan arıtuv ve temizlev» ve «barışıqsever insanlar, hususan Rusiye Federatsiyasınıñ vatandaşlarına qarşı qanlı cinayetler yapqanlarnı mahkemege berüvni» ayttı. Qırım.Aqiqat, Ukraina ve dünyadaki adise-vaqialarnı taqip ete.

Şaatlarnıñ aytqanına köre, Ukraina raketa ateşi altında qaldı.

• Ava mudafaa bölükleri, arbiy baza ve ava bazaları, idare sistemalarına qarşı ateş etile.

Çeşit Ukraina ve Ğarp kütleviy haber vastalarınıñ mühbirleri ve şaatlar Mariupol, Harkiv, Odesa, Dnipro ve Kyiv civarlarında olğan küçlü patlavlar aqqında bildire – Putin arbiy operatsiya aqqında beyanatında «DNR» ve «LNR» reberleriniñ arbiy yardım ricasını qayd etti.

• Kramatorsk, Harkiv ve Kyivde patlavlar aqqında haber etile. Kramatorskta dört patlav, Odesa, Berdânsk, Donbasta küçlü patlavlar aqqında haber etile.
• Ukraina paytahtında Poznâkı ve Troyeşçina sakinleri patlavlarnı eşitti. «Borıspil» ava limanı rayonında patlav ve ateşler aqqında bildirile.

Künniñ eñ müim haberleri:

Ukraina Mudafaa nazirligi Sumı, Ğostomel uçaq alanı, Geniçesk, Skadovsk, Çaplınkada uruş devam ete, dep bildire: «Şimaliy ve Cenübiy taraflarda vaziyet kergin. Ğostomel uçaq alanı (Kyiv civarlarından 15-20 kilometr uzaqlıqta – muar.) ve Geniçesk, Skadovsk, Çaplınka (Herson vilâyeti işğal etilgen Qırımğa yaqın – muar.) içün muarebe devam ete».

«Sıñırcılar Ukraina silâlı quvetleri ve Milliy gvardiyanen beraber Sumı civarında Rusiye işğalcilerinen uruşa. Ukraina askerleri mudafaanı qoruy. Berilgen malümatqa köre, Rusiye Konotop meskün yerinden ücüm ete», – dep aytıla haberde.

***

Lugansk vilâyetindeki Starobelsk civarında Ukraina ve Rusiye arbiyleri çatışmağa devam ete, Rusiye tankları, piyade askerlerniñ maşinaları Ukraina arbiylerine Starobelsk kirişinde ücüm ete, dep haber ete Birleşken quvetler operatsiyasınıñ matbuat hızmeti.

«Uruş kete, vaziyet kergin», – dep aytıla haberde.

Birleşken quvetler operatsiyasınıñ malümatına köre, rusiyeliler şeerni kontrol altına almağa tırışa, amma «Ukraina askerleri istilâcılarğa lâyıq bir cevap bere». Berilgen malümatqa köre, Ukraina tarafından tanklarğa qarşı bölükler çalışa. Uruşlar vaqtında eki Rusiye tankı ve bir zırhlı taşıyıcı yoq etildi.

***

Ukraina silâlı quvetleri yañıdan gruppalandı ve bir qaç yönelişte mudafaa uruşlarını keçire, dep haber ete Ukraina Silâlı quvetleriniñ Baş ştabı.

Saat 13:00-ğa qadar, arbiylerniñ malümatına köre, Rusiye ordusı «Kalibr» raketaları, aviatsiya, toplardan 30-dan çoq darbeni grajdan ve arbiy infrastrukturağa endirdi.

Baş ştab Ermeni Bazar – Herson, Çaplınka – Kahovka yönelişlerinde sıñırlarnı keçip ücüm etkenleri ve Bessarabskiy operatsion rayonında ve Qara deñiz operatsion rayonında diversantlarnıñ işi aqqında bildire.

***

NATO onıñ erkânına kergen topraqlarnıñ «er bir düymini» qoruycaq, dep bildirdi fevralniñ 24-nde baş kâtip Jens Stoltenberg NATO devletleriniñ elçileri Brüsselde körüşken soñ, dep haber ete Azatlıq Radiosı.

«Biz yañı azimkârlıq ve daa büyük birliknen cevap bermelimiz», – dep ayttı Stoltenberg matbuat konferentsiyasında. O, NATO nizamnamesiniñ 5-inci maddesini qayd etip, İttifaqnıñ yapqanlarını imaye dep adlandırdı: birleşmeniñ bir azasına ücüm etüv bütün aza devletlerine ücüm ola.

Onıñ aytqanına köre, ittifaq NATO azası olmağan Ukraina Rusiye ücümine oğrağan soñ da ittifaqçı memleketleri içün «mudafaa planlarını» faalleştire.

Şimaliy atlantik ittifaqnıñ baş kâtibi, ğarbiy arbiy alyans mudafaasını pekite ve azalarınıñ ava boşluğını qorumaq içün yüksek azırlıqlı 100-den çoq arbiy uçaqqa saiptir.

***

Bankova Rusiye quvetleri Kyivdeki ükümet kvartalına ücüm ete bile, dep bildire, dep ayttı fevralniñ 24-nde brifing vaqtında Ukraina prezidenti ofisiniñ buhran ile küreş mesleatçısı Mıhaylo Podolâk.

«Şimdi Gostomelde küçlü uruşlar devam ete ve ükümet kvartalına keçmege tırışa bileler. Maqsadlarından biri – memleketniñ reberligini çıqarmaqtır», – dedi o.

***

Rusiye prezidentiniñ matbuat kâtibi Dmitriy Peskovnıñ jurnalistlerge bildirgenine köre, putin Ukraina prezidentinen muzakerelerge azır, amma şartı bar: Ukraina «bitaraf status» aqqında laf etmege ve «silâ sistemalarından vazgeçmege» azır olmalı, dep yaza «Nastoyaşçeye Vremâ» telekanalı (RFE/RL şirketi tarafından «Amerikanıñ sesi» iştirakinen quruldı).

Peskov böyle dedi: «Ukrainanı temizlesek, onı natsistlerden, natsizmge ve bu mefkürege qoltutqan insanlardan qurtarsaq, yahşı olur».

***

İç işler naziriniñ mesleatçısı Anton Ğeraşçenko fevralniñ 24-nden sabadan Ukrainanıñ bir qaç şeerindeki arbiy idare merkezleri, uçaq alanları, arbiy anbarlarğa raketa darbeleri endirildi, dep bildirdi. O, ateş sıñırda da devam ete, dep qoştı.

Ukraina prezidenti Volodımır Zelenskıy bütün Ukrainada cenk vaziyetini ilân etti. O, Rusiye Ukraina arbiy ve sıñır infrastrukturasına darbe endirdi, dep tasdıqladı.

Ukraina Devlet sıñır hızmeti fevralniñ 24-nde saba bildirgenine köre, Ukraina devlet sıñırı Rusiye, Beyazrusiye ve işğal etilgen Qırım tarafından Rusiye ordusınıñ ücümine oğradı.

«Sıñır bölükleri, sıñır taqımları ve keçiş noqtalarına top, ağır tehnika ve atıcılıq silâsınen ücüm etile. Bu Lugansk, Sumı, Harkiv, Çerniğiv ve Jıtomır vilâyetlerinde yapıla. Bundan ğayrı, vaqtınca işğal etilgen Qırım Muhtar Cumhuriyetinden de ücüm etile», – dep aytıla Ukraina Devlet sıñır hızmetiniñ Facebook haberinde.

Berilgen malümatqa köre, duşmannıñ diversion-istihbaratçı gruppaları çalışa.

ABD prezidenti Joe Biden Rusiyeniñ Ukrainağa kerçekleştirgen «sebepsiz ücümini» takbih etti, dep aytıla fevralniñ 24-nde Amerika halqına yapqan muracaatında.

«Prezident Putin felâketli qurban ve dert ketirecek bir cenk istedi. Bu ücüm ketirecek ölüm ve viranelerden tek Rusiye mesüliyetlidir. ABD, ittifaqdaşları ve ortaqları bir ve qararlı bir şekilde cevap berecekler. Dünya Rusiyege ceza çektirecek», – dep bildire Beyaz saray Bidenniñ aytqanlarını.

Biden, vaziyetni Beyaz Saraydan ve milliy telükesizlik hızmetiniñ haberlerinden taqip etecek, dep qoştı.

«Rusiye Federatsiyasınıñ Ukrainağa ve global dünya ve telükesizlikke qarşı kereksiz tecavuz içün Rusiyege qarşı Amerika Birleşken Devletleri, ittifaqdaşlarımız ve ortaqlarımız yapacaq areketler qararını qabul etmek içün saba G7 zenaatdaşlarımnen körüşecem, soñra Amerikanıñ halqınen laf etecem. İttifaqqa qarşı er angi tecavuznı toqtatacaq qararlı, umumiy bir cevapnı temin etmek içün areketlerimizni NATO ittifaqdaşlarımıznen koordinatsiya etecekmiz», – dep qayd etti Amerika prezidenti.

Bu daqqaları BM Telükesizlik şurasınıñ Ukrainanen bağlı acele toplaşuvı devam ete.

Ukraina Mudafaa naziri Oleksiy Reznikov Rusiye Ukrainağa ücüm etkeni içün ukrainalılarğa muracaat etti.

Oleksiy Reznikov

«Qıymetli ukrainalılar! Duşman şarqtaki bölüklerimizge, diger regionlardaki arbiy idare merkezleri ve uçaq alanlarına ateş açtı. Ukraina ordusı imaye ete ve Rusiye askerlerine qarşı tura. Askerlerimiz sizni qorumaq ve tecavuzcığa ilerilemege bermemek içün elinden kelgenini yapa. Bugün daa bir kere sizge muracaat etem: tınçlıqnı saqlap tutıñız! İmkânıñız olsa, evde qalıñız. Vaziyet kontrol etile, amma ordumız qoltutuvıñızğa muhtac. Tınçlığıñız ve Ukraina Silâlı quvetlerine işanmañız eñ yahşı yardımdır», – dep muracaat etti Reznikov.

Ukraina fevralniñ 24-nde «yüksek telükeler» sebebinden grajdan aviatsâisınıñ uçaqları içün ava boşluğını qapattı, dep bildire Ukraina uçaq areketleri hızmetleri devlet müessisesi. Grajdan aviatsiyası içün sıñırlavlar ne qadar devam etecek «Ukraeroruh» bildirmey.

Azatlıq Radiosınıñ mühbiri Donetsk vilâyetindeki Çasovıy Yar Birleşken Quvetler Operatsiyalarınıñ baş ştabında yanğın aqqında bildire.

Onıñ malümatına köre, yanğın raketa darbesi neticesinde başlandı. Diger tafsilâtlar şimdilik yoq.

Boris Johnson «Ukrainadaki deşetli adiselerden şokta olğanını» bildirdi. Onıñ aytqanına köre, Putin «qan töktirüv ve yoq etüv yolunı» sayladı. Baş nazir Büyük Britaniya ve ittifaqdaşlarınıñ qararlı cevabı olacaq, dep söz berdi.

NATO Baş kâtibi Jens Stoltenberg Rusiye Ukrainağa «aqılsız ve sebepsiz ücüm etti», dep bildirdi.

«Rusiyeniñ Ukrainağa qarşı pek çoq barışıqsever sakinlerniñ ayatını telükege oğratqan aqılsız ve sebepsiz ücümini takbih etem. Bir çoq tenbi ve bitmegen diplomatik ğayretlerimizge baqmadan, Rusiye daa bir kere suveren ve mustaqil memleketke qarşı tecavuz yolunı sayladı», – dep bildirile Stoltenbergniñ aytqanları İttifaqnıñ saytında derc etilgen haberde.

Kyiv:

Azatlıq Radiosınıñ mühbirleri bildirgenine köre, Kyivde, hususan Zafer meydanı rayonında sirenalar eşitile.

Kyiv şeer yolbaşçısı Vitaliy Kliçko kritik infrastrukturada çalışmağan şeerlilerni evde qalmağa ve kerekli şeylerni yanında tutmağa çağırdı: «Kritik infrastruktura ve şeerniñ yaşayış teminlevi işinde iştirak etmegenler evleriñizde qalıñız. «Telüke cemidanıñız» azır olsun. Vesiqalar, kerek olğan eñ müim şeyler. Kerek olsa, sığınaqqa tez barıp yetmek içün».

Kyiv akimiyeti «avadan telüke» aqqında haber ete, sirenalar çalışıp başlasa, tez-tez bomba sığınağına ketmege rica ete.

Kyiv metrosı adiy rejimde çalışa.

Ukraina Baş ştabı:

Ukraina Baş ştabı bildirgenine köre, Ukraina Silâlı quvetleri Donbasta 5 Rusiye uçağını ve vertolötini tüşürdi.

«Birleşken Quvetler komandanlığınıñ malümatına köre, bugün, fevralniñ 24-nde, Birleşken Quvetler keçirilgen rayonda tecavuzcınıñ 5 uçağı ve vertolöti tüşürildi. Birleşken Quvetler Rusiye Federatsiyasınıñ silâlı quvetlerine lâyıq bir şekilde qarşı tura. Arbiy bölükler öz mevzilerindedir. Duşman zarar köre. Tınçlıq saqlap tutıñız ve Ukraina imayecilerine işanıñız», – dep aytıla haberde.

Ukraina Tış işler naziri Dmıtro Kuleba «Putin Ukrainağa qarşı cenk başlattı», dep bildirdi. «Barışıqsever Ukraina şeerlerine qarşı darbe endirile. Bu istilâiy bir cenk», – dep yazdı o, Twitterde.

Rusiye Ukraina sıñırcılarına işğal etilgen Qırımdan ateş açtı. Bir Ukraina sıñırcısı elâk oldı, dep haber ete Ukraina Devlet sıñır hızmeti.

«Vaqtınca işğal etilgen Qırımdan raketa sistemalarından açılğan ateş neticesinde Herson vilâyetindeki Preobrajenka mesken noqtası rayonında bir sıñırcı elâk oldı. Ölgen diger insanlar aqqında malümat alına», – dep bildirdi Devlet sıñır hızmeti.

Qırım:

Ukraina Devlet sıñır hızmeti Rusiye arbiy tehnikasınıñ Qırımdan esas Ukrainağa ketkeninen video derc etti.

İşğal altındaki Qırımnıñ Rusiye yolbaşçısı Sergey Aksenov Qırımda yüksek seviyeli azırlıq rejimi kirsetile, dep bildirdi.

«Qırım Cumhuriyetinde yüksek seviyeli azırlıq rejimini kirsetmek qararı alındı. Bu meselelerni qolay al etmek imkânı içün kerek. Cumhuriyetniñ sıñırındaki meskün yerlerden tahliye yoq. Kene de bu meskün yerlerden Qırımnıñ merkezine ketmege istegenler içün yardım tedbirleri alındı», – dep bildirdi Aksenov.

Malümat qoşula