Rusiyede yañı 2022 yılı kelgenini qayd etip başladılar. Yanvarniñ 1-i Çukotka ve Kamçatkada başlandı, dep bildire Azatlıq Radiosınıñ rus hızmeti.
Bu regionlarnıñ sakinlerine Rusiye prezidenti Vladimir Putinniñ muracaatı endi kösterildi.
O, bitken yılda Rusiye sakinleri «büyük zorluqlarğa rastkeldi», amma «birdemlik» sayesinde «sert şaraitlerde» yaşamağa ögrendi, dep ayttı. Putin koronavirus yuqunçı epidemiyasını aytıp, «onlarnen biñ ayatnı alğan» (resmiy Rusiye akimiyetiniñ malümatına köre, yüzlernen biñ ayatnı – muar.), dep qayd etti. Esas yılbaş hayırlavı olaraq qaviy sağlıq tiledi.
Putin, balalar «sağlam, aqıllı, namuslı ve serbest» össin, dep tiledi. Putin, akimiyetniñ esas vazifesi «insanlarnıñ eyiallığını arttıruv» ola, dep ayttı.
TASS, bu tebrik tarihta Putinniñ eñ uzun hayırlavı oldı, dep qayd etti. O, 6 daqqa 22 saniye devam etti.
Qırım sakinleri yañı yılnı Moskva saatınen qarşılaycaq – yani esas Ukraina sakinlerinen bir saat farq olacaq.