Martnıñ 18-inde Rusiye prezidenti Vladimir Putin Aqyarğa keldi, anda ise BalıqlavaTES-iniñ açılışında iştirak etecek ola, dep bildire TASS rusiye haber agentligi.
Bundan ğayrı Putin, videobağ vastasınen Tavrik TES-i ve Tamandaki “Port” podstantsiyasınıñ açılışını ilân etecek.
Aqyarda o “Malahov qurğanı” tafrihiy abideni ziyaret etmege azırlana.
Bundan soñ Putin Aqmescitke ketip, anda ilhaqnıñ beş yıllığına bağışlanğan bayram merasimlerinde iştirak etecek.
Soñra, beyanatqa köre, Putinniñ frenkistan siyasetçileriniñ bir taqımınen, olarnıñ arasında frenkistan parlamentiniñ sabıq mebusı Terry Marianinen,körüşüv añlaşması bar.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.