Çerniğiv vilâyetiniñ Prilukı şeerinde Rusiye tarafından yapılğan ücüm neticesinde dört insan elâk oldı, daa 20 kişi yaralandı, olarnıñ arasında üç bala bar, dep bildire Ukrayina Fevqulâde vaziyetler devlet hızmeti ve malümat ilk olaraq berilgenini qoştı.
"Bir adamnı fevqulâde vaziyetler hadimleri qurtardı. Başqa bir yerde ise, Rusiye ücümleri sebebinden, istisal binasında yanğın çıqtı", — dep aytıla haberde.
Orta küzniñ 7-nde gece ve saba Ukrayinanıñ bir qaç regionı RF quvetleriniñ birleşken darbesine oğradı. Kıyivde gece ballistik darbe neticesinde eñ azından eki insan elâk oldı, aynı zamanda Dnipro, Zaporojjâ, Kremençuğ, Prılukıda da zarar körgenler qayd etildi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.