Ukrayina Prezidenti ofisi Rusiyege "barışıq" şartları ile bağlı qarşı talaplarnı kösterdi.
"Rusiye TİN ağzından "Rusiyeniñ talapları" daa çoq Rusiye reberliginiñ uquqiy ve faktik beceriksizligini tasdıqlay. Şunıñ içün yalıñız "Ukrayinanıñ qarşı şartları" ola bilir - bütün ordunıñ deral Ukrayina topraqlarından çıqarıluvı. ŞSCB-niñ dağılğanını ve sabıq Sovetler birliginiñ terkibindeki memleketlerniñ suverenitetiniñ qabul etilüvi. Arbiy cinayetçilerniñ ve cenkniñ müellifleriniñ ekstraditsiyası", -dep yazdı Mıhaylo Podolâk.
Rusiye TİN yolbaşçısınıñ muavini Mahail Galuzin Ukrayina ile cenkni toqtatmaq içün eñ az altı şartnı ayttı. Olardan biri - Ukrayina "arbiy areketlerni toqtatmaq" kerek eken. Bunı o, TASS Rusiye agentligine intervyü berir eken bildirdi.
Galuzinniñ sözlerine köre, "vaziyetniñ al etilmesi içün" tirenüvden red etmekten ğayrı Ukrayina daa Ğarptan kelgen silâlardan red etmeli. "Ertaraflı, adaletli ve qaviy" barışıq içün Ukrayina NATO ve Avropa Birliginiñ azası olmamalı, "yañı territorial kerçekni" qabul etmeli, rus tilini devlet tili kibi tanımalı ve esas insan aqlarına, şu cümleden din serbestligi aqqına riayet etmeli.
Moskva onıñ vaziyetniñ al ejtilüv yanaşmaları deñişmez olğanını ve "Donbas sakinleriniñ qorçalavını, arbiysizleştirüvni ve Ukrayinanıñ denatsiyafikatsiyasını" köz ögünde tutqanını bildire.
Ukrayina prezidenti Volodımır Zelenskıy, cenkniñ bitmesiniñ yekâne şartı Rusiye ordusınıñ Ukrayina topraqlarından çıqarılması olğanını defalarca degen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.