Ukraina prezidenti Petro Poroşenko yanvarniñ 5-nde İstanbulda Türkiye prezidenti Recep Tayyip Erdoğan ile körüşip, Rusiye apishanelerinde tutulğan ukrainalı siyasiy mabüslerniñ azat etilmesi ve işğal etilgen Qırımda insan aqları bozulğanını muzakere etti.
Bu aqta Ukraina prezidenti Memuriyetiniñ saytında aytıla.
«Devlet yolbaşçısı Türkiyeniñ devletimizniñ topraq bütünligi ve sıñırlarına deñişmegen qoltutuvına yüksek qıymet kesti ve Türkiye Cumhuriyetine 2018 senesi dekabr ayında qabul etilgen BM Baş Assambleyasınıñ Qırım ve Azaq deñiziniñ Rusiye tarafından askeriyleştirilüvini takbih etken qararını azırlamağa yardım etkeni içün teşekkürler bildirdi. Qanunsız şekilde mahküm etilgen Ukraina vatandaşlarınıñ Rusiye apishanelerinden azat etilmesi ve Qırımda Rusiye işğali şaraitlerinde Ukraina vatandaşları, hususan qırımtatarlarnıñ aqlarını temin etüv tedbirlerine ayrı diqqat celp etildi», – dep aytıla haberde.
Yanvarniñ 5-nde İstanbulda Fener Rum Patrigi Bartholomeos Ukraina Ortodoks kilsesi içün tomosnı imzaladı.
Poroşenko, tomosnı imzalav tedbirinde iştirak etmek içün yanvarniñ 5-nde İstanbulğa keldi.
Keçken sene oktâbr ayında Rusiye işğal etken Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Ümerov Türkiyege teslim etilgen edi. Resmiy olmağan malümatqa köre, Çiygoz ve Ümerovnıñ teslim etilmesi aqqında Türkiye prezidenti Recep Tayyip Erdoğannıñ Rusiye prezidenti Vladimir Putin ile keçirgen körüşüvinde añlaşılğan edi.
Aq qorçalayıcılarnıñ malümatına köre, 60-tan ziyade Ukraina vatandaşı Rusiye ve işğal altındaki Qırımda siyasiy sebeplerden azatlıqtan marum etilgen edi. Ukraina Tış işler nazirligi Rusiyege 300 kere narazılıq bildirip, anda tutulğan ukrainalılarnıñ azat etilmesini talap etti.