Ukraina prezidenti Petro Poroşenko Milliy telükesizlik ve mudafaa şurasınıñ (RNBO) 2018 senesi noyabrniñ 26-nda «Devlet sıñırları ve Ukraina mustaqilliginiñ temin etilmesi içün nevbetten tış tedbirler ve Ukrainada cenk vaziyetini ilân etmesine dair» qabul etken qararı aqqında buyruqnı imzaladı. №390/2018 ferman metni Ukraina prezidentiniñ saytında derc etildi.
«Ukraina Anayasasınıñ 107-nci maddesine istinaden: Ukraina milliy telükesizlik ve mudafaa şurasınıñ 2018 senesi noyabrniñ 26-nda «Devlet sıñırları ve Ukraina mustaqilliginiñ temin etilmesi içün nevbetten tış tedbirler ve Ukrainada cenk vaziyetini ilân etmesine dair» qabul etken qararını yerine ketirmege emir etem», – dep aytıla Poroşenkonıñ saytında.
Ukraina prezidentiniñ fermanınen işke tüşürilgen Ukraina milliy telükesizlik ve mudafaa şurası qararınıñ yerine ketirilmesini RNBO kâtibi kontrol etecek.
Buyruq derc etilgen künü işke tüşürile.
Ukraina Anayasasınıñ 107-nci maddesine köre, RNBO Ukraina prezidenti yanında milliy telükesizlik ve mudafaa meseleleri boyunca koordinatsion organı ola. RNBO icra akimiyet organlarınıñ milliy telükesizlik ve mudafaa saasındaki faaliyetini idare ete ve kontrol ete.
Noyabrniñ 26-nda gece Ukraina milliy telükesizlik ve mudafaa şurasınıñ toplaşuvında cenk vaziyetini kirsetmek içün azırlıq körmege qarar alındı. Bu meseleni Ukraina parlamenti bazarertesi künü qapalı toplaşuvda baqmalı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı.
Your browser doesn’t support HTML5
Cenk vaziyeti Rusiye istilâsı sebebinden ilân etile – Poroşenko
Ukraina prezidenti Petro Poroşenko Kremlden Keriç boğazında tutılğan Ukraina deñizcileri ve gemilerini acele azat etmesini talap etti.
Your browser doesn’t support HTML5
Keriç boğazında ne oldı (video)
Tünevin Rusiye Ukraina arbiy gemileri Keriç boğazından keçmesin dep, Keriç boğazını vatandaş gemileriniñ keçmesi içün de qapattı. Ukraina Tış işler nazirligi noyabrniñ 25-nde olğan adiseden soñ Rusiyeniñ Qara ve Azaq deñizlerinde yapqanlarını tenqit etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.