ABD Devlet kâtibi Mike Pompeo Rusiyeni Qırım işğalinen razı olmağan mahküm etilgen rejissör Oleg Sentsov, faal Volodımır Baluh ve daa tahminen 70 insannı azat etmege çağırdı. Bu aqta fevralniñ 27-nde Devlet departamentiniñ saytında derc etilgen ABD devlet kâtibiniñ beyanatında aytıla.
«Birleşken Devletler Qırımda Rusiye işğalci rejimi tarafından quvetleştirilgen repressiyalardan sebep qasevetlene. Soñki beş yıl devamında Rusiye işğalci akimiyeti Qırım üzerinde kontroline qarşı muhalifetni yoq etmek içün kampaniyadaki bir sıra cinayetlerde iştirak etken edi. Bu kampaniya çerçivesinde Rusiye işğalge qarşı barışıq tirenüv köstergen şahıslarnı tutqan, bazı vaqıtları ise bu insanlarnı işğal etilgen Qırımdan Rusiyege avuştırğan edi», – dep aytıla beyanatta.
Birleşken Devletler Rusiyeni «bütün ukrainlerni, şu cümleden işğalge razı olmağan apiske alınğan qırımtatar halqınıñ vekillerini azat etmege» çağırdı.
«Mında Oleg Sentsov, Oleksandr Kolçenko, Volodımır Baluh, Ruslan Zeytullayev ve daa 70 insan aqqında laf kete. Bizler Rusiyeni bütün cinayetlerni, Qırım işğalini toqtatmağa ve halqara uquqqa köre vazifelerni, hususan işğal qanunını yerine ketirmege çağıramız», – dep aytıla Pompeonıñ beyanatında.
Pompeo bildirdi ki, Birleşken Devletler Qırım Ukraina toprağı ola ve Ukraina kontroline qaytarılmalı dep tasdıqlay.
Ukrainada salı künü, fevralniñ 26-nda, «Qırımnıñ Rusiye işğaline qarşı tirenüv künü» qayd etildi. 2014 senesi şu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.