Poloniya tış işler naziri Radoslav Sikorskiy Brükselde Avropa Birliginiñ tış işler nazirlerinen körüşkende, Ukrayinağa öz mudafaası içün uzaq mesafeli silânı qullanmağa ruhset bermekni teklif etti.
"Bu, Ohmatdıt bala hastahanesine yapılğan vahşiy ücümden soñ ilk körüşüv. Men zenaatdaşlarıma muracaat etip, uzaq mesafeli silânıñ qullanuvına sıñırlavlarnı lâğu etmelerini rica ettim, böylece Ukrayina, raketalarnı uçurğan uçaqlarnı ve bu uçaqlarnıñ uçqan ava limanlarını urıp, ileride böyle ücümlerniñ ögüni ala bile. Menimce, bu, halqara uquqı çerçivesinde qanuniy olğan bütünley öz-özüni mudafaa etmek olur edi. Balalar içün onkologiya hastahaneleriniñ qorçalavı — kerginleşüv degil", — dep ayttı Radoslav Sikorskiy iyülniñ 22-nde.
Bundan da ğayrı, Poloniya tış işler naziriniñ aytqanına köre, o, sanktsiyalar basqısını arttırmağa ve yılnıñ soñuna qadar Ukrayina Rusiye aktivlerini öz işlevleri ve silâ satın aluvı içün qullanmasına qol tuttı.
"Rusiyeniñ yañı pasportları biometrik olması içün Çeh Cumhuriyetiniñ teklifine qol tuttım, çünki bu Rusiye akimiyetiniñ areketlerini qıyınlaştıracaq", — dep qoştı Sikorskiy.
Rusiye akimiyeti defalarca böyle darbeler çatışmanıñ daa da kerginleşmesine ketirecegini bildirgen edi. Rusiye prezidenti Vladimir Putin mayısnıñ 28-nde, Ğarp memleketleri Ukrayinağa öz silâsını Rusiyege ücüm etmek içün qullanmasına izin berse, "ciddiy aqibetler" olacağı aqqında tenbiyeledi.
Harkiv vilâyetinde Rusiye ücümi başlağan soñ Ukrayina prezidenti Volodımır Zelenskıy, Rusiye Federatsiyasına ücüm etmek içün ğarbiy silânıñ qullanılmasına yasaq olmamaq kerek, dep bildirdi, çünki Ukrayina ücümi aqqında degil, qoruv aqqında söz yürsetile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.