Orta küz ayınıñ 17-ne keçken gecesi Rusiyeniñ "Saq" aviabazası yerleşken Saq rayonınıñ Novofedorovka qasabasında ve Saq şeerinde patlavlar yüz berdi. Gece patlavlar Aqmescit rayonında ve Canköy ve Canköy rayonlarında eşitildi, dep haber ete "Krımskiy veter" telegram kanalı.
Rusiye Mudafaa nazirligi, Qırım üzerinde ava mudafaası vastaları tarafından 32 pilotsız uçaq yaqalandı ve yoq etildi, dep bildirdi.
Orta küz ayınıñ 17-nde saba Qırımnıñ işğal akimiyeti elektrik aqsağanı, tamir-tiklev işleri keçirilgeni ve tasil müessiseleriniñ iş rejimi aqqında haberdar etmege başladı.
Qırımnıñ Rusiye yolbaşçısı Sergey Aksönov bildirdi ki, pilotsız uçaqlarnıñ ücümi neticesinde Qırım Cumhuriyetiniñ bir qaç elektrik stantsiyası zarar kördi. Şimdilik tamir işleri alıp barıla.
"İçtimaiy ağlardaki farqlı saifelerdekş malümatqa köre, Kezlevdeki mekteplerde dersler lâğu etildi. Ana-babalarğa mektep subetlerinde, balalarnı bugün mektepke yibermemege çağıralar, dersler lâğu etildi. Şeerde elektrik energiyası ve suv teminlevi yoq", — dep yaza "Krımskiy veter".
Hatırlatamız, bazarertesi künü, orta küz ayınıñ 13-nde, işğal etilgen Qırımnıñ eki elektrik stantsiyasına dron ücüm etken edi.