«Facebookta çaldır ve yaz». Qurmandaki «Hizb ut-Tahrir davası» mabüsleriniñ esnası (fotoresimler)
Qurmandaki «Hizb ut-Tahrir davasınıñ» eñ yaş mabüsi Eskender Abdulganiyevniñ odası tintüvden soñ bu alda edi. Eskender SİZOğa tüşkende 21 yaşında edi. Qırımlı «terror teşkilâtınıñ faaliyetinde iştirak etkeninde» qabaatlandı.
Eskender – tek bu davanıñ degil, Qırımdaki bütün «Hizb ut-Tahrir davalarınıñ» eñ yaş mabüsidir. Prokuror onı 16 yılğa üküm etmege talap etti, mahkeme ise 12 yıl apis cezasını berdi – ilk eki yılı apishanede, qalğan yıllarnı sert rejimli koloniyada keçirecek. Fotoresimde o ve advokatı Lilâ Gemeci ilk mahkemelerden birinde
Mopedde – Eskender Abdulganiyevniñ anası Emine. O, sıcaq aş pişirip, sımarış etkenlerge alıp kete. Apiske alınmazdan evel bunı Eskender yapa edi. Şimdi qadın özü dümen başına oturdı
Emiruseinovlar qorantasınıñ evinde keçirilgen tintüv levhasıdır. Rusiye quvetçileri tek Rustemniñ evini degil, onıñ etrafını da sarıp alğan edi
Bu insanlar Rustem Emiruseinovnıñ ailesine tintüv künü qol tutmağa toplaştı
Rustemniñ ana-babası öz evinde. Apiske alınğannıñ babası Reşat Emiruseinov bu fotoresimge baqıp, qoranta resimi tolu degil, çünki oğulları yetmey, dep ayttı. Rustemniñ anası şimdi hastahanede buluna: qadın bu künleri çıqqan bir kişilik narazılıq aktsiyasından «acele yardımnen» ketti. Rostovdaki mahkeme oğlunı 17 yılğa üküm etti. İlk eki yılını apishanede, qalğanını sert rejim koloniyasında keçirecek
Arsen Abhairovnıñ qızı Medine babası devamlı iş ziyaretinde bulunğanından emin. 2019 senesi fevral ayında çağına yetmegen beş bala babasız qaldı
Arsen Abhairov ve Eskender Abdulganiyevniñ anaları oğulları apiske alınğan soñ
Arsen Abhairov mahkeme salonında. Onı 13 yılğa üküm etkenler – ilk eki yılını apishanede, qalğanını sert rejimli koloniyada keçirecek
Arsen Abhairovnıñ ömür arqadaşı Azize aqayınıñ sıñırlav tedbiri uzatılğan oturışuvdan soñ mahkeme binası ögünde
Arsenniñ advokatı Azizege Arsenniñ qorantası içün tahqiqat izolâtorında yapqan resimini berdi. O, beyaz pamuq basmasında qalemnen yapılğan. Arsenniñ aytqanına köre, resimde SİZOdaki şaraitler tasvir etilgen