Camiden sinagogağa qadar: Kezlevniñ merkezinde kezinti (fotoresimler)

Kezlev tramvayı şeerniñ soqaqlarında ilk sefer 100 yıl evelsi peyda olğan edi. №1 marşrutı – eñ uzundır. O, bütün şeerden keçe: Sputnik-2 qasabasından Aqmescit soqağına qadar.

2003 senesi Kezlevniñ 2500 yıllığı arfesinde şeerde büyük bir rekonstruktsiya keçken edi. Merkezdeki Teatralnaya meydanı deñişti, anda şeer tuğralı barelyefler, Kezlev içün müim olğan adise-vaqialar ve şahıslar ile hatıra tahtası peyda oldı

Bir qaç yıldan soñ onıñ qarşısında metsenat ve qaray tamırlı filantrop Semen Duvannıñ abidesi tiklendi. 1906 senesinden başlap aman-aman 1917 senesiniñ inqilâbına qadar o, Kezlevniñ şeer yolbaşçısı edi ve provintsial şeerçikni halqara kurortqa çevirdi

Teatralnaya meydanına yaqın küçük parkta bir yıl evelsi şeerniñ adı ile 13 metrlik tahta skemle peyda oldı. Onıñ yanında yazda turistler foto yapa

Merkeziy meydandan eki tramvay durağı mesafesinde Cuma Cami yerleşe. O, 450 yıl evelsi I Devlet Geray han ükümdarlığı vaqtında qurulğan edi

Caminiñ qomşulığında – Svâto-Nikolay soborı. O, 19-ıncı asırnıñ soñunda Aziz Nikolay Mirlikiyskiyniñ kilsesi yerinde quruldı

«Odun-bazar qapusı» (Gezlev qapusı) medeniy-etnografik merkezi orta asırlarda şeerniñ qale qapusınıñ esas parçası edi. O vaqıtları Yevpatoriya Gezlev edi. Bugün merkezniñ üçünci qatında müzey yerleşe, bir alt qatta ise «Kezlev qavesi» qavesi mevcut

Gezlev qapusı yanında Kezlevniñ merkeziy qısmında eñ büyük suvenir bazarlarından biri yerleşti. Ediyelik ve şarqiy tatlılardan başlap dekor elementleri ve milliy qıyafetlerge qadar er şey bar. Bir çoq şey elnen yapılğan

Turistler alışqan suvenirlerden ğayrı, şeerniñ tarihiy merkezinde antika «yıqıluvlarını» da tapmaq mümkün

Gezlev qapusından Kezlevniñ esas ekskursiyası – «Küçük Qudus» – başlana. Oña ondan ziyade obyekt, şu cümleden Cuma Cami ve Svâto-Nikolay soborı, em de Qaray kenasaları, Derviş tekiyeleri, Ermeni kilsesi, türk hamamları ve diger yerler, kirmekte

Karaimskaya ve Prosmuşkinıh soqaqlarınıñ kesişme noqtasında Qırım işğalinden soñ çar qorantasınıñ süreti ile büyük bir graffiti peyda oldı. Anda soñki rus çarı II Nikolay tasvir etilgen. O, ömür arqadaşı ve balalarınen Svâto-Nikolay soborından çıqa

Prosmuşkinıh soqağından aşağı ketkende «Yegiya-Kapay» sinagogasına rastkelmek mümkün. O, 1912 senesi yerli esnaflarnıñ parasına qurulğan edi. Şu sebepten de Esnaf adını alğan edi. Binanıñ ögünde tögerek vitraj ve altı köşeli yıldız mevcut

Kezlevniñ tarihiy qısmında soqaqlar tar ve üstüne taşlar töşelgen