Rusiye TİN spikeri Mariya Zaharova, Ukraina akimiyet organlarınıñ Aqmescitteki fahriy konsullıqnıñ açılması sebebinden Nikaragua Cumhuriyetine qarşı sanktsiyalar qoyulmasına dair qararını “kulünçli”, dep adlandırdı.
“Yaqınlarda Ukraina başlıqları, ülke reberligi tarafından Qırım Cumhuriyetinde fahriy konsullıq tayin etilmyesine cevap olaraq Nikaraguağa qarşı sanktsiyalar qoydı. Bu qarar pek külünçli körüne. Bilgeniñiz kibi, 2017 senesinden başlap Ukraina ve Nikaragua resmiy olaraq ticaret ortaqlar degiller, şu sebepten sanktsiyalar qoyulacaq bir şey yoq. Körünip tura ki, bu bir ümütsizlik areketidir”, – dedi Zaharova cumaaqşamı brifing vaqtında.
O, bir daa işğal etilgen Qırım ve Aqyarnı “Rusiye toprağı”, dep adlandırdı.
“Bir daa tekrar etem, Qırım Cumhuriyeti ve Aqyar şeeri Rusiye Federatsiyasınıñ subyektleridir. Tış devletlerniñ Rusiye toprağında konsullıq temsilciliklerniñ açılması bu, devletler arasındaki üçünci devletlerge ait olmağan, şu cümleden Ukraina da, eki taraflı munasebetlerimizdir. Ukraina akimiyetini kirişmemege ve Ukraina ile alâqası olmağan diger devletler arasındaki eki taraflı temaslarğa tesir etmege tırışmamağa çağıramız”, – dedi Zaharova.
Rusiye TİN spikeri Mariya Zaharova Kyivge “Nikaraguanı raat qaldırmağa” tevsiye etti.
Ukraina akimiyeti Zaharovanıñ aytqanına şimdlik daa cevap bermedi.
Fevralnıñ 1-nde Ukraian prezidenti Volodımır Zelenskıy Yuqarı Radanıñ baqıluvına Nakaraguağa qarşı sanktsiyalar qoyulması aqqında qararnı teklif etti. Fevralnıñ 2-nde Ukraina parlamentiniñ mebusları bu qararğa qoltuttılar.
Avgustnıñ soñunda Ukraina TİN başı Dmıtro Kuleba, Qırımda Nikaraguanıñ fahriy konsullığı açılğanını bildirgen edi. Konsulnıñ vazifesine Qırımnıñ ilhaqında iştirak etken Oleg Belavenets tayin etilgen.
Oktâbrde Ukraina Nazirler Kabineti işğal etilgen Qırımda konsullığını açqanı içün Nikaraguağa sanktsiyalar qoymağa teklif etti. Nikaragua Ukraina ükümetiniñ qararını açıq tefsir etmedi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.