İlhaq etilgen Qırımğa raatlanmaq içün esasen Rusiye devlet işçileri ve bücet saasınıñ turistleri kele, Rusiye vatandaşlarınıñ bir qısmı ise Türkiye kurortlarında raatlanmağa seve, dep ayttı Ukraina Tış işler naziri Pavlo Klimkin Qırım.Aqiqatqa.
Onıñ aytqanına köre, Qırımda Rusiyeden kelgen turistler paranı iqtisat ete ve ucuz yerlerde qala.
«Mence, anda olğan şeyler total deşet ola. Aqlı yerinde olğan rusiyeli turist işğal etilgen Qırımğa barmay. Bu devlet işçileri, «bücet» turistleri, para masraf etmey, anda yarım sovet şifahanelerde yaşaylar. Qayd etem ki, ötellerde degil, şifahanelerde. Olar içün bu – ayat: olar Rusiye ve sovet zihniyetiniñ içinde bulunalar. Normal rusiyeliler ise – baqıñız: er kes Türkiyede. Rusiye vatandaşları bile işğal etilgen Qırımğa barmay», – dedi Pavlo Klimkin.
Your browser doesn’t support HTML5
«Total deşet»: Klimkin Qırımdaki vaziyet aqqında (video)
Klimkinniñ qayd etkenine köre, işğal altındaki Qırımda raatlanacaq olğan insanlar «işğal etilgen topraqta özüni telükesizlikte is etmege mümkün olmağanını» unutmamalı.
Qırımdaki Rusiye kurort nazirliginiñ bildirgenine köre, 2018 senesi ilhaq etilgen yarımada 6,8 mln turistni qabul etti, bu raqam 2017 senesinde olğan turistlerden aman-aman üç qat ziyadedir. Nazirlikniñ malümatına köre, olardan yarım millionğa yaqın kişi Ukraina vatandaşı edi. Ukraina Devlet sıñır hızmeti Qırımnıñ memuriy sıñırından keçken yolcularnıñ sayısına esaslanıp, bu malümatnı inkâr etti.