Mahsus Qırım.Aqiqat
İşğal etilgen topraqlarda olğan keyfler aqqında bütün laflar bir problema tirele. Andan açıq-aydın içtimaiyatımız yoq.
Bundan da başqa - o olmaycaq. Mesele, ukrain içtimaiyatçıları anda tetqiqatnı yapıp olamağanında degil. Rusiye içtimaiyatı doğru olmağanında da degil. Mesele şunda ki, işğal etilgen topraqlarda tetqiqatlarnıyapmaq ğayesi başından neticesizdir. Çünki samimiylik cezalana bilecek vaziyette cevap bericilerniñ bir qısmı ya indemeycek, ya da tolu cevap bermeycek.
Aslında, içtimaiy ağlarğa köre işğal etilgen topraqlardaki keyfler aqqında qıymet keskende de bunı hatırlamaq kerek.
Qırımdan ve Donbasstan tefsir etkenlerniñ umumiyleştirilgen sıfatı olduqça sadedir. Rusiyeni seve, Ukrainağa nefret besley, Hreşçatıkta rus bayraqlarını bekley. Bundan ğayrı Avropa Birliginiñ dağılmasına işana, Amerikadaki qatliam ve yağmalarğa quvana ve İlon Masknıñ yeñişlerine yana. Tecavuzkâr şekilde davalaşa ve bütün bölgeniñ adından aytmağa ıntıla.
Ve onıñ istegenini yapmaq bir hata olur edi.
İşğal etilgen topraqlarda yaşağanlar şimdi eki taqımğa bölüne. Birileri Ukrainanen köpürlerni yaqmağa yetiştirdi. Başqaları - yoq
İçtimaiy ağlarda adamnıñ alıp baruvınıñ radikalizm derecesi bir sade faktornen belgilene. Bölgege ukrain bayraqlar qaytsa, onıñ taqdiri ne olacaq? Çünki işğal etilgen topraqlarda yaşağanlar şimdi eki taqımğa bölüne. Birileri Ukrainanen köpürlerni yaqmağa yetiştirdi. Başqaları - yoq.
Birileri Ukraina ordusına qarşı cenk etip yetiştirdi. İşğalci memuriyetlerde hızmet etti. Donbassta soğuncılıqnen belli oldı ya da Qırım akimiyet organlarında karyera yapa. Başqaları - şahsiy yaşayış alanında yaşay. Memuriy vertikallerge toqunmay. Sıñırnı keçmek imkâniyetini saqlaylar.
Birincileri, Ukraina qaytsa, bölgeni terk etmege mecbur olacaqlarını añlay. Olarnıñ üzerinde cinaiy taqibat ve mahkeme davaları telükesi bar. Bu adamlar içün Ukrainanıñ ğalebesi şahsiy yutquzma olacaq. Bundan sebep içtimaiy ağlarğa kelgende, olar ifadelerden utanmay. Muabbetleşmeyceklerini bildire ve olduqça radikal olmağa tırışalar. Rusiye işğali - olarnıñ şahsiy keleceginiñ yekâne fırsatıdır.
Ekinci taqım ise başqadır. Olar ukrain qanunlarnı bozmadı. Antlarını - arbiy ya memuriy - bozmadı. Em de olar Ukrainanıñ qızğın vatanperverleri olmamalı. Yaşayış tarzlarında resmiy Kyiv cinayet faaliyetini tapmaycağı daa müimdir.
İşte tamam bu sebep ile olar içtimaiy ağlarda o qadar faal degiller. Çünki yarımadada ya da Donbassta bayraqlarnıñ deñişüvi olar içün Rusiyege qaçmaqnıñ zarureti olmaycaq. Bazıları Ukrainnanıñ qaytmasını bekley. Başqaları - sadece turmuşlarını tüşüne. Amma olarnıñ sesi, olar eşitilmege istemegenleri içün eşitilmey. Olar "radar altına" ketti ve olardan qalğan şimdi tek sahte akkauntlar ve aşhane lafları bar.
Çünki işğal etilgen bölgelerniñ adından sadece köpürlerni yaqqanlar sesli laf etip ola
Çünki işğal etilgen bölgelerniñ adından sadece köpürlerni yaqqanlar sesli laf etip ola. Olarnıñ qaçmağa yeri yoq - ve endi olar Kremlge qol tuta. Olarnıñ alternativaları yoq, bunıñ içün Ukrainanı cezalavnen qorquzalar. Episilerni "bot" saymağa yañlış olur edi. Bu adamlar sadece, olarğa çerçivesinde yer tapılğan kerçekni qoruy. Kerçek deñişse - olarğa yer tapılmay bile.
Açıqlıq ve bellilik monopoliyası olarğa tesadüfen tiydi. Çünki başqaları susmağa mecbur. İşğal etilgen topraqlarda Ukraina tarafında olğan sesler tahqiq etile, onıñ içün Rusiye tarafında olğanlar alternativasız birileri kibi eşitile. Amma olarnı umumiy fikirniñ ifadesi olaraq qabul etmege yañlış olur edi.
Budır vaziyetniñ hususiyeti. Biz Qırım ve Donbass keyflerini bilmeymiz. Bu meselede içtimaiyatqa esaslanıp olamaymız. İçtimaiy ağlarnı baqıp çıqmağa olamacaqmız. Sadece tahminler ve faraziyeler yapa bilemiz, amma bundan ziyadesini degil. Onıñ içün "qapalı içtimaiyat" ve "elektorat keyfleri" aqqında er türlü laflar meni küldüre.
"İşğal" sözünde çoq şey bar. Amma samimiylikke anda iç yer tapılmaz.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Pavel Kazarin, qırımlı jurnalist, Qırım.Aqiqat közeticisi