Orenburg vilâyetiniñ Orsk şeerinde bent patladı. Orenburg vilâyetiniñ ükümeti bildirgenine köre, umumen regionda 102 mesken yerde 2556 mesken evni ve 6886 ev yanındaki topraqnı suv bastı.
Suv basuvdan Orsknıñ Eski şeeri eñ çoq zarar kördi. Elâk olğanlar aqqında haberler kele. «112» Telegram kanalı malümatına köre, dört insan elâk oldı. Baza haber etkenine köre, eñ az eki insan elâk oldı. RİA Novosti yazğanına köre, Eski şeerde eki ceset tapıldı.
TASS operativ hızmetniñ malümatına esaslanıp haber etkenine köre, suv basuvda elâk olğan üç insan tapıldı. «İnterfaks» bildirgenine köre, eki ceset tapıldı, amma ölümleri suv basuvnen bağlı degil.
Rusiye Tahqiqat komiteti bent patlağanı içün qurucılıq işleri vaqtında telükesizlik qaideleriniñ bozuluvı maddesine istinaden cinaiy davanı açtı. Bundan evel Orenburg vilâyetiniñ prokuraturası da bunı talap etti.
Müessise malümatına köre, bent patlavınıñ sebebi «bentniñ kerekli tehnik alda tutulması içün vaqtında alınmağan tedbirler» oldı.
TASS Rusiye devlet agentligi Orsktaki bentniñ bütünley bozuluvı aqqında bildirdi. Soñra Orenburg vilâyetiniñ akimiyeti bu malümatnı inkâr etti.
«İnterfaks» regionnıñ valisi ve ükümetiniñ matbuat hızmetine esaslanıp, bent tek «eñ büyük yük çekken» yerde bozuldı.
«Bent bir qaç kilometrli. Suv çoq olğan yerde zarar köre. Cumaertesi künü saba 10 metr mesafede zarar oldı», – dep bildire yerli akimiyetniñ malümatını agentlik.
TASS malümatına köre, dört biñden çoq ev ve 10 biñden çoq yerli sakin suv basuvdan zarar kördi. Al-azırda Orenburg vilâyetinde 4,2 biñden çoq sakin tahliye etildi, aralarında biñden çoq bala bar.
Altı rayonda 12 mesken yerde elektrik problemleri oldı. Yedi mesken noqtasında elektrik energiyası yedek generatorından berile, vaziyet deñişmegence beşi ışıqta qala. Bundan ğayrı, onlarnen köpür ve yüzlernen yol qapatıldı.
Rusiye Federatsiyası Fevqulâde vaziyetler hızmetiniñ malümatına köre, 711 insan, şu cümlede 210 bala Orsktan çıqarıldı. Vaqtınca yerleştirüv noqtasında 242 insan buluna, hususan 73 bala buluna.
Yerli sakinler aytqanına köre, Orskta suv «Orsk-Novoorsk» yolunı ve yuqarı köpür yanında tramvay yollarını bastı – yol qapatıldı. Orenburg yalı kenarı bir gecede suv altına ketti.
Yerli akimiyet yerli sakinlerni acele tahliye olmağa çağıra. Orsk şeer yolbaşçısı Vasiliy Kozupitsanıñ fikirince, eñ yaqın künleri suv seviyesi eksilmeycek – buña bir buçuq-eki afta kete bile. Onıñ tarif etkenine köre, aprelniñ altısında saba Ural özeni 7 m telükeli seviyeden 9,27 metrge qadar köterildi.
«Suv çıqa. İnsanlar yaşağan ve evler turğan yerde. Bugünki künde bir qaç saat içinde dört metrge qadar köterildi», – dep qayd etti o.
Altay ülkesi, Kemerovo, Novosibirsk ve Tomsk vilâyetinde büyük baar suv köterilüvleri oldı. Çünki iklim baari eki afta erte keldi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.