Ukraina Yuqarı Radasınıñ insan aqları vekâletlisi Lüdmila Denisova qırımtatar faali Edem Bekirovnıñ sağlıq vaziyetine dair muracaatnı Rusiye zenaatdaşı Tatyana Moskalkovağa yolladı.
«Advokatnıñ malümatına köre, qırımtatarınıñ qan basımı yüksek, yüzü qızardı. Bundan ğayrı, imayeciniñ bildirgenine köre, Bekirov tutuluv şaraitleri kerekli kibi degil ve tibbiy yardım kösterilmegeni içün açlıqnı ilân etmege istey», – dep yazdı Denisova Facebookta.
Onıñ aytqanına köre, daa evel o, Bekirovnıñ insannıñ ayatı içün telükeli olğan bir sıra hastalığı aqqında Moskalkovağa bir qaç kere bildirgen edi. SİZOda tutulğanından Bekirovnıñ sağlıq vaziyeti ep fenalaşa. Faqat, Ukraina ombudsmeniniñ qayd etkenine köre, Aqmescit tahqiqat izolâtorınıñ memuriyeti Bekirovnı hastalıqlarına baqmadan tibbiy bölükke almay.
«Şu sebepten Ukraina vatandaşınıñ ayatı içün qaçınılmaz aqibetlerge yol bermemek içün kerekli tibbiy yardım kösterilüviniñ temin etilmesi içün acele tedbir almağa rica ettim», – dep qayd etti Denisova.
Your browser doesn’t support HTML5
«Aqayım dayanır, o, küçlüdir». Edem Bekirovnıñ ömür arqadaşı onıñ apiske alınması aqqında (video)
Qırımtatar faali Edem Bekirov tibbiy teşkerüvden soñ berilgen insulin iñektsiyalarından sebep allergiya keçirdi.
Ukraina ombudsmeni Lüdmila Denisova Ukrainadaki AB Missiyasınıñ yolbaşçı muavini Annika Valdemann ile körüşip, silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovnıñ sağlıq vaziyetini muzakere etken edi. o, Bekirov ekimlerniñ yardımına ve kerekli tutuluv şaraitlerine muhtac, dep qayd etti.
SEE ALSO: «O, qorqunç şaraitlerde buluna»Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.