Rusiye tarafından işğal etilgen Herson vilâyetiniñ Oleskı şeerinde "tınçlıq rejimi" endi 30 saat devam ete, bu vaqıt devamında bir de bir intsident olmadı, dep bildirdi Ukrayina Yuqarı Radasınıñ insan aqları vekâletlisi Dmıtro Lubinets.
"Oleskı şeerinde 30 saatlıq tınçlıq rejiminde bir de bir intsident olmadı. Bu menim ve Rusiye insan aqları vekâletlisi Yana Lantratovanıñ daimiy alâqaları sayesinde mümkün oldı. Biz bağda bulunamız ve tizilgen añlaşmalarnıñ yerine ketirilmesini koordinatsiya etemiz", — dep yazdı o Orta küzniñ 28-nde saba telegramda.
Ombudsmen ABD-niñ birinci hanımı Melaniya Trampqa, "gumanitar missiyasına ve Oleşkıda vatandaşlarğa yardım etüvge öz vaqtını ayırğanı içün" teşekkür bildirdi.
"Onıñ bütün taqımına da destekleri, devamlı kommunikasiyası ve bütün ğayretleri içün teşekkürler bildirem. Bizim umumiy maqsadımız — Oleşkınıñ vatandaş ealisine yardım etmek ve muhtac olğanlarnıñ telükesiz çıqması içün şarait yaratmaqtır", — dep qoştı o.
Orta küzniñ 23-nde Beyaz ev, Ukrayina ve Rusiye "gumanitar yardımnıñ kirmesini ve vatandaşlarnıñ telükesiz koridor vastasınen tahliye etilmesini azırlamaq içün "Oleşkıda ateş toqtatılmasına" razı oldılar, dep bildirdi.
Dmitro Lubinets, Orta küzniñ 29-nda, Oleşkığa gumanitar yardımnıñ ketirilmesi, Oleşkıdan çıqmaq istegen vatandaş ealisiniñ serbest areketiniñ bloksuzlanması ile bağlı gumanitar missiya başlanacaq, dep añlattı.
Oleşkı Rusiye tarafından 2022 senesi Kiçikte, keñ kölemli basuvnıñ ilk künlerinde işğal etildi.
Herson OVA-sınıñ malümatına köre, tahminen eki biñ insan, olarnıñ arasında aman-aman 50 bala, Oleşkıda qala. Memuriyetniñ aytqanına köre, Rusiye quvetçileri yardımnıñ ketirilmesine keder ete ve sakinlerni şeerden çıqmağa imkân bermey.