Ukrayina arbiyleri oktâbrniñ 4-ne keçer gecesi Rusiye işğal etken Herson vilâyetindeki Oleşkı şeerine gumanitar yükni yetkizdi, dep bildirdi Ukrayina iç işler naziri İvan Vığovskıy.
Herson vilâyetiniñ bu şeerinde gumanitar buhran ve açlıq vaziyetinde uçucısızlar yardımınen şeerge ekinci kere aşayt mahsulatları ve ilâclar ketirile.
Vığovskıynıñ aytqanına köre, operatsiyanı Mıhaylo Ğruşevskıy Ukrayina Milliy gvardiyasınıñ 11-inci brigadası ve Ukrayina Milliy gvardiyasınıñ 34-ünci Herson polku kerçekleştirdi.
"Umumen uçucısızlar yardımınen Ukrayina Milliy gvardiya arbiyleri deñiz piyadesiniñ 30-ıncı korpusı, "Borisfen" deñiz piyadesiniñ 34-ünci ayrı brigadası ve Ukrayina Devlet sıñır hızmetiniñ 79-ıncı sıñır otrâdı umumen 4 tonnalıq paketlerni alıp ketti. Bu aşayt mahsulatı, ilâclar ve balalar içün şeyler", – dep ayttı o.
Sentâbrniñ 27-nde Herson vilâyetiniñ arbiy memuriyeti haber etkenine köre, Ukrayina arbiyleri ağır dronlar yardımınen işğal etilgen Oleşkı şeerine tahminen dört tonna aş ve ilâc yetkizdi. Yük şeerniñ yüz noqtasına alıp ketirildi.
Vilâyetniñ arbiy memuriyeti bergen malümatqa köre, tahminen 50 bala olğan eki biñge yaqın insan Oleşkı şeerinde qala. Memuriyet Rusiye quvetleri yardım ketirilüvine mania ola ve sakinlerni şeerni terk etmek imkânından marum qaldıra, dep bildire.
Halqara teşkilâtlarnıñ Rusiye akimiyetinen vatandaşlarnı işğal etilgen şeerden tahliye etüv aqqında añlaşmağa tırışması şimdilik neticesiz oldı.
Oleşkı şeeri 2022 senesi fevral ayında büyük istilânıñ ilk künleri Rusiye tarafından işğal etildi. Şeer Herson vilâyetiniñ serbest ve işğal etilgen qısımları arasında tabiiy sıñır olğan Dnipronıñ sol tarafında yerleşe.