Odesada soqaqlardan biriniñ adını qırımlı, vatandaş faali, sabıq siyasiy mabüs Ğenadiy Afanasyevniñ şerefine deñiştirdiler
Bunı Ğenadiyniñ anası Ölğa Afanasyeva Facebook saifesinde bildirdi. Haberge köre, Afanasyevniñ şerefine general Tsvetayev soqağınıñ adı deñiştirildi.
"Dostlar! Endiden Odesada Ğenadiy Afanasyev soqağı bar! Qahramanlarğa ebediy şan-şeref! Er keske teşekkürler!", — dep yazdı Ölğa.
Daa evel haber etilgenine köre, Afanasyevniñ şerefine Kıyiv soqaqlarından biriniñ adını deñiştire bileler.
Aqmescitli fotoqraf ve uquqçı Ğenadiy Afanasyevniñ adı "Qırım terroristleri" davasınıñ mabüsi olğanından soñ belli oldı. 2014 senesi o, Rusiyeniñ Qırım ilhaqına qarşı çıqqan edi, bundan soñ onı Aqmescitte FSB hadimleri terror ücümlerini azırlağanında qabaatlap yaqaladılar. O vaqıt onıñnen beraber bu davanıñ diger mabüsleri de tutuldı. Halqara aq qorçalayıcı teşkilâtlar bu davanı siyasiy dep adlandırdı. O, 767 kün apiste yatqan edi.
2016-2018 seneleri Ğenadiy Afanasyev Rusiye apishanesinden azat etilgen soñ Qırım.Aqiqat müellifi edi.
2022 senesi dekabrniñ soñunda Afanasyev Luğansk vilâyetinde elâk olğanı belli oldı. O, 241 brigadasınıñ 130 batalyonında cenkleşti. Afanasyev, Rusiyeniñ Ukrayinağa arbiy istilâsınıñ birinci künü arbiy komissarlıqqa ketti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.