«İlk malümatqa köre, Rusiye ücümi neticesinde 8 insan elâk oldı, 18 kişi yaralandı. Qurbanlar arasında bir bala bar», – dedi o.
Kiperniñ aytqanına köre, vatandaş infrastrukturasına, şu cümleden mesken binalarğa zarar keldi.
Odesada bulunğan «Avropa birdemligi» tarafından halq deputatı Oleksiy Gonçarenko da sekiz adamnıñ ölümi belli olğanını ayttı.
«Duşman raketanı mesken yerge, iş faaliyeti meydanına yolladı. Şimdi biz endi sekizge yaqın ölüni bilemiz, insanlar öz işlerinen oğraşmağa kete ediler», – dedi halq deputatı.
Ukrayina prezidentiniñ ofis yolbaşçısı Andriy Yermak vaziyetni izaatlap, Rusiye Federatsiyası tarafından Odesanıñ vatandaş infrastrukturasına maqsatlı bir ücüm olğanını qayd etti.
Bir kün evelsi yerli akimiyet noyabrniñ 17-nde Rusiyeniñ darbesi sebebinden Odesa vilâyetinde eki insan can berdi, bir ösmür yaralandı ve issilik, suv ve elektrik energiyası teminlevinde toqtavlar olğanı aqqında haber etti. Cam bergen eki kişi «Ukrenergonıñ» hadimleri edi.
Noyabrniñ 17-nde aqşam Rusiye Sumı şeerindeki mesken binağa raketa ücümi yaptı, eñ az 10 adam elâk oldı, 52 adam yaralandı.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.