X Odesa kinofestivaliniñ qapalış merasiminde qırmızı halıda Rusiyede apiske alınğan qırımlı ukrain rejissöri Oleg Sentsovğa qoltutuv aktsiyası keçirildi.
Festivalniñ matbuat hızmeti bildirgenine köre, aktsiyada Milliy yarış programmasınıñ jüri azaları iştirak etti: Amerika kino tenqitçisi Nikolas Elliot, Poloniya stsenariy müelllifi ve rejissör İoanna Kos-Krauze, İran rejissöri Maniya Akbare ve Ukraina prodüseri İvanna Dâdüra.
Olar rejissörni azat etmek çağıruvı ile qırmızı halıdan keçti.
Daa evel Odesa halqara kinofestivalinde Oleg Sentsovnıñ «Nomera» pyesası boyunca ukrain filminiñ treyleri taqdim etildi.
Kinofestivaliniñ açılış merasiminde Ukraina baş naziriniñ muavini Pavel Rozenko Sentsov, 2018 senesi noyabr ayında Rusiye FSBsi tarafından zapt etilgen ukrainalı deñizciler ve Kremlniñ bütün ukrainalı reinleri aqqında hatırlattı. Sentsovğa qoltutuv sözlerini Britaniya rejissöri, Cannes festivali mukâfatlarınıñ laureatı Mayk Li bildirdi.
Qırımlı rejissör Oleg Sentsov ve anarhist Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
Oleg Sentsov Rusiye şimalindeki Labıtnangi şeerinde apiste yata. Aleksandar Kolçenko ise Uraldaki Kopeysk şeeriniñ koloniyasında buluna.
Keçken sene Rusiye apishanelerinde tutulğan bütün ukrainalı siyasiy mabüslerni azat etmek talabı ile tutqan 145 künlik açlıqtan soñ Oleg Sentsov «aşamağa yazma şekilde razı oldı». O, bunı «zornen aşatuv telükesi bar olğanından mecburiy adım» dep adlandırdı. Amnesty International zornen aşatuv işkence ola, dep bildirdi. 2018 senesi oktâbrniñ 25-nde Sentsovğa Avropa parlamentiniñ «İfade serbestligi» içün Saharov mukâfatı berildi.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.