Odesada Rusiye darbesi sebebinden elâk olğanlarnıñ sayısı eki insanğa arttı, dep bildirdi şeerniñ arbiy memuriyet yolbaşçısı Serğiy Lısak.
"Rusiye ücüminiñ qurbanlar sayısı arta. Yıqılğan binanı baqqanda Prohorovskaya soqağında qurtarıcılar erkek cesedini çıqardı", – dep yazdı o, Telegramda.
Bu aqta vilâyetniñ arbiy memuriyet yolbaşçısı Oleg Kiper bildirdi. Onıñ aytqanına köre, elâk olğan kişi 52 yaşında edi.
Rusiye Odesa vilâyetine yanvarniñ 27-ne keçer gecesi daa bir darbe endirdi, yerli akimiyet elâk olğan kişi aqqında bildirgen edi. Odesada yaralanğan 20 insan aqqında daa belli.
Zelenskıynıñ aytqanına köre, Rusiye ordusı yanvarniñ 27-ne keçer gecesi Odesağa 50 uçucısıznen ücüm etti, esas nişanları energetika ve "adiy vatandaş obyektleri" edi. Bu darbeden beş mesken ev zarar kördi, daire ve kirişlerde yıquvlar bar. Şeerde qurtaruv operatsiyası kete.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.