Qırım gazetaları yarımadadaki koronavirus vaziyeti, oquv yılınıñ hususiyetleri ve Aqmescitteki kommunal problemler aqqında yaza.
«Komsomolskaya pravda. Krım» yañı koronavirus dalğası sebebinden küzde yarımada karantinge qapatıla bile, dep yaza. Gazetanıñ malümatına köre, bir qaç kün evelsi Qırımda bir künde koronavirusnen hastalanğan insanlarnıñ sayısı rekord oldı – 51 kişi. «İçtimaiy ağlarda 2020 senesi sentâbrniñ 20-nden itibaren Qırım tekrar karantinge qapatılacaq kibi malümat tarqaluvı şaşırtmadı. Sentâbrniñ ekinci yarısına turistlerge yer ayırmağa istemeyler, dep haber etildi, cemaat toplaşqan yerlerde de tedbir sımarışları alınmay».
Rusiye kontrolindeki Qırım yolbaşçısı Sergey Aksenov koronavirus sebebinden sıñırlar tekrar kirsetilecek kibi öşeklerni red etti. Qırımda ekinci koronavirus dalğası küz-qış mevsiminde beklenile, dep qayd ete neşir.
«Krımskaya pravda» «Ocalar maska taqacaq» serlevalı maqalesinde yarımadadaki koronavirus vaziyeti aqqında yañı oquv yılı ceetinden tarif ete. Gazetanıñ qayd etkenine köre, yarımadada mektep ocaları ve bala bağçalarınıñ terbiyecilerine ara-sıra koronavirus testi yapılacaq. «Oquv yurtlarında virus qısqa vaqıt içinde tapılsa ve mütehassıslar kollektivde tarqalmaması içün acele tedbir alsa, tasil esnası toqtatılmaycaqtır», dep bildirdi Rusiye kontrolindeki Qırımnıñ Rospotrebnadzor yolbaşçısı Natalya Penkovskaya.
65 yaştan büyük ocalar özüni qorumaq içün maska taqmaq mecburdır. Mektep talebeleri sınıflarnı deñiştirmeycek: er bir sınıfqa bir oda berilecek. Ders içün mahsus donatma kerek olsa, bu alda başqa odağa keçecekler.
«Krımskiy telegraf» «Sıcaq mevsim» maqalesinde şeer akimiyeti Aqmescitte kommunal tertip-nizam tizecek ola, dep bildire. «Temizlik ve raatlıq – farqlı regionlarda mezarlıq işiniñ deñişmegen atributıdır. Qırımnıñ paytahtında köy mezarlığı içün tek birincisi müim eken. Acınıqlı, farqlı manalarda, körünişniñ sebebi – bücette yetmegen paradır. Para olsa, işçiler otlarnı çalıp, çöplük toplap başlar. – dep yaza gazeta. – Memuriyet şeer mezarlıqlarını temizleycek imkân qıdırğanda, olarnıñ vaziyeti daa beter ola. Bu em Abdal, em eski rus, em bir çoq diger mezarlıqta körüne. Amma yañı konteyner meydançıqlarına şeerniñ parası yete. Sentâbr ayında «Ekograd» belediye unitar müessisesi qoşma baklarnı alacaq. Bu aktual bir mesele, çünki şeerdeki çöplükniñ 15%-ı – tabiiy çöplük obalarıdır».
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.