İyünniñ 8-ne keçer gecesi Ukrayina uçucısızları Rostov ve Volgograd vilâyetlerine ücüm etti. Krasnodar ülkesinde Novorossiyskke qarşı ücümden soñ "Şesharis" kompleksindeki rezervuar cermay parkı yandı.
Yanğın olğanını Kuban operativ ştabı tasdıqladı: 130 kişi yanğınnı söndüre. Akimiyet obyekt adını aytmay, amma ASTRA telegram kanalı şaatlarnıñ videolarına baqıp, "Gruşovaya" sanayı meydançığı zarar kördi, dep qayd etti. Bu Novorossiyskten 12 km mesafede olğan "Çernomortransneftniñ" eñ büyük rezervuar parkı – anda million kubometrge qadar cermay ola bile.
Volgograd vilâyetiniñ Jirnovskiy rayonında tüşürilgen uçucısız parçaları "sanayı-dispetçer hızmetinde" tüşti, dep bildirdi region yolbaşçısı Andrey Boçarov. Anda endi söndürilgen yanğın çıqtı, yaralanğanlar yoq, dep bildire akimiyet. Supernova+ Telegram kanalı yazğanına köre, uçucısızlarnıñ nişanı cermay taşığan "Krasnıy Yar" sanayı-dispetçer hatı oldı.
Rostov vilâyetinde Çertkovskiy ve Verhnedonsköy rayonları ücümge oğradı, yaralanğanlar ve yıquvlar aqqında haber etilmey.
Aynı vaqıtta Rusiye ordusı Ukrayinağa ücüm etmek içün kene Primorsko-Ahtarsk ve Millerovodaki poligonlarnı qullandı, dep bildirdi memleketniñ Ava küçleri. Yaralanğanlar bar.