Yanvar 18-inde, cuma künü, Qırım ve qıta Ukraina arasında memuriy sınırnıñ yanındaki Novooleksiyivka qasabasında, Memuriy hızmetler Merkeziniñ tantanalı açılışı keçirildi. Bu aqta Qırım.Aqiqat mühbiri bildire.
Açılışnı Çehiya cumhuriyeti elçiliginiñ vekilleri, Ukraina prezidentiniñ qırımtatar halqı işlerinden vekâletlisi, qırımtatar halqınıñ lideri Mustafa Cemilev, Ukraina prezidentiniñ Qırımda vekâletliginiñ hadimleri, Herson vilâyeti, Geniçesk rayonı ve Novooleksiyivka qasabasınıñ başlıqları ziyaret etti.
Tantanalı açılıştan soñ, musafirler, numayış ve başqa tedbirler keçirilmesi içün qasaba şurasına davet etildi.
Мустафа Джемилев открывает ЦПАУ в Новоалексеевке
Novooleksiyivka qasaba şurasınıñ başı Aleksandr Burkovskiy Qırım.Aqiqatqa ikâye etkenine köre, Memuriy hızmetler Merkezi, Ukrainada Çehiya cumhuriyetiniñ elçiliginiñ maddiy destegi ile
“Strategik tedqiqatlarnıñ Qırım institutı” (Kyiv) cemaat teşkilâtı ve Ukraina prezidentiniñ Qırımda vekâletliginen beraberlikte tizildi. Onıñ maqsadı - “Ukraina vatandaşlarına, şu cümleden Ukrainanıñ vaqtınca işğal etilgen Qırım topraqlarında yaşağanlarğa da, memuriy hızmet berilmesiniñ keyfiyet köterilüvidir”.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».