Soçideki Rusiye Üçünci istinaf mahkemesi bıltır "Ateş" areketi ile bağlar ve olarğa yaqarlıq anbarına dair malümatnı bergeninde qabaatlanıp, 15 yılğa üküm etilgen Qırımnıñ Seyitler rayonınıñ sakini Niyara Ersmambetovağa Qırım mahkemesiniñ çıqarğan ükmüne qarşı istinaf şikâyetini baqtı. Bu aqta "Qırım esnası" aq qorçalayıcı leyhası bildirdi.
Rusiye mahkemesiniñ saytında mabüsnen bağlı malümat gizlengen edi, baqıluvı ise davada "devlet sırı" işaretli vesiqalar olğanı içün qapalı oldı. Mahkeme qararını deñiştirmemek qararı Rusiye İç işler nazirligi küç qurulışlarında çalışqan Rusiye qadısı Kliment Sutâginge aittir.
"Bu ve silâlı zıddiyetniñ taraflarından biriniñ vatandaşlığı olğan qadınıñ zıddiyetniñ diger tarafı ile işbirliginde qabaatlanğan işğal etilgen topraqlarnıñ sakinine qarşı mahkeme esnasında iştirak etmesi – mahkemeniñ tarafsızlığını şübhege oğrata", – dep yaza "Qırım esnası".
Qayd etilgenine köre, birinci mahkemede dava "qadınıñ mustaqillik ve tarafsızlıq ceetinden ciddiy şübhelernen" baqıldı – ükümni Ukrayina uquq qoruyıcı organları tarafından aqqında eki dava açılğan ve aq qorçalayıcı ve jurnalist İrına Danılovıçnıñ mahkeme esnasında "FSBge bağlılıq köstergen" qadı Natalya Külinskaya çıqardı. Keçken sene devamında qadı Külinskaya hırsızlanğan qırımlılar İsmail Şemşedinov ve Aleksandr Osadçiyge qarşı devlet hainligi ükümlerini çıqardı.
"Niyara Ersmambetova eki çağına yetmegen balanı özü baqqanına emiyet berilmedi. Ne birinci mahkeme, ne de istinaf mahkemesi buña diqqat etmedi ve ceza çekmesini balalarnıñ çağına yetmesine qadar qaldırmadı. Bu qadılarnıñ devlet hainliginde qabaatlanğan qadınlarğa qarşı cinaiy davalarğa yanaşuvı sertleşkenini köstere", – dep bildirdi "Qırım esnası".
Bıltır yazda belli olğanına köre, işğal etilgen Qırımda FSB hadimleri Seyitler rayonından aphane hadimi Niyara Ersmambetovanı tuttı. Bu aqta "Tribunal. Krımskiy epizod" "Irade" teşebbüsine esaslanıp haber etti.
Aq qorçalayıcılarnıñ malümatına köre, Ersmambetova 2025 senesi mayıs soñunda apiske alındı ve Aqmescit SİZO-1-de tutuldı. Onı "devlet hainliginde" qabaatladılar (Rusiye Federatsiyası Ceza kodeksiniñ 275-inci maddesi) – işğal etilgen topraqta tirenüv areketlerinden birine yaqarlıq anbarına dair malümat bergen eken. Tahqiqat versiyasına köre, bu malümat darbe endirilüvi içün qullanıla bile.