Mahküm etilgen qırımtatarı Niyara Ersmambetova Rusiye işğal etken Aqmescitteki SİZO-1-den Rusiye içine etap etile bileye. Bu aqta "Tribunal.Krımskiy epizod" aq qorçalayıcı leyhası Cezalarnı yerine ketirüv federal hızmeti sistemasındaki menbalarına esaslanıp haber ete.
Onıñ malümatına köre, siyasiy mabüsni tuvğan evinden 1,7 biñ km Mordoviya koloniyasına alıp keteler.
Bıltır noyabr ayında Seyitler rayonınıñ sakini Niyara Ersmambetova devlet hainligi qabaatlavınen 15 yıl koloniyada (Rusiye Federatsiyası Ceza kodeksiniñ 275-inci maddesi) qalmasına üküm etildi. Laf "Ateş" Ukrayinağa qoltutuv areketinen işbirligi aqqında kete – işğal etilgen topraqta tirenüv areketlerinden birine malümat berüv. Rusiye tahqiqatınıñ versiyasına köre, bu malümat darbe endirmek içün qullanıla bilir.
Bu yıl aprel ayında üküm deñiştirilmedi. Birinci ve istinaf mahkemeleriniñ qadıları qadınlarnıñ eki çağına yetmegen balası olğanına ve olarnı esli-başlı babası baqqanlarına qulaq asmayıp, cezasını balalar çağına yetkenine qadar qaldırmağa razı olmadı.
Bu yıl iyün ayında qadın SİZOda şaraitlerden sebep açlıq ilân etti. Rusiye Federatsiyası Cezalarnı yerine ketirüv federal hızmeti malümatnı izaatlamadı.