Nijnekamsk şeerindeki (Rusiye, Tataristan Cumhuriyeti) sanayı alanında martnıñ 31-nde kündüz küçlü patlav oldı ve yanğın çıqtı. Şaatlarnıñ malümatına köre, qomşu binalarnıñ camları qırıldı.
Rusiye Fevqulâde vaziyetler nazirligi bildirgenine köre, 13 insan yaralandı.
Nijnekamsk şeer yolbaşçısı Sovmir Belâyevniñ haber etkenine köre, yanğın "Nijnekamskneftehim" müessisende çıqtı, sebebini aytmadı.
"Nijnekamskneftehim" zavodında yanğınnı söndürmege devam eteler. Operativ hızmetler celp etildi. Yanğın söndürilüvine celp etilmegen müessise hadimleri telükesiz mesafege alındı", – dep yazdı Belâyev Telegram kanalında. "Yanğınnıñ ilk sebebi olaraq donatma işinde bozuvlar aytıldı. Adise yerinde tibbiy hızmetler çalışa, yaralanğanlarğa kerekli yardım kösterile", – dep aytıla "Nijnekamskneftehim" haberinde.
Moskva vaqtınen saat 13:54-te Rusiye aviatsiyası Nijnekamsk ava limanınıñ işi "uçuşlarnıñ telükesizligini temin etmek içün" toqtatıldı, dep bildirdi – böyle sıñırlavlar uçucısız telükesi sebebinden kirsetile. Lâkin saat 14:03-te sıñırlav lâğu etildi.
"Ostorojno, novosti" ve Shot Telegram kanallarınıñ malümatına köre, "Nijnekamskneftehim" zavodında eñ az eki kişi yaralandı, istisal tsehi zarar kördi.
"Ostorojno, novosti" yazğanına köre, Nijnekamsk sakinleri zavoddaki patlavdan soñ "himik qoqunı" şikâyet ete. Nijnekamsk şeer yolbaşçısı ilân etkenine köre, "akkreditatsiyasını yapqan laboratoriyalarnıñ mütehassısları avanı kontrol ete, sakinler ve ekologik müit içün bir telüke qayd etilmedi".
"Nijnekamskneftehim" – Tataristanda bulunğan büyük Rusiye cermay himik müessiselerinden biridir. SİBUR holdingine kire.